Քաղաքական ուժերը շարունակում են ամփոփել ապրիլի 2-ի ընտրությունների արդյունքներն ու խոսել հետագա ծրագրերից: Արդեն խոսվում է հնարավոր կոալիցիայի մասին: ՀՀԿ-ական Գագիկ Մինասյանը, մասնավորապես, չի բացառում, որ իրենք կոալիցիա կկազմեն ՀՅԴ-ի հետ: Հարցը քննարկվելու է վաղը կայանալիք Հանրապետական կուսակցության գործադիր մարմնի նիստում:
Իսկ Դաշնակցությունից, որտեղ դեռեւս նախընտրական շրջանում խոսում էին, որ այս ընտրություններն իշխանափոխության հնարավորություն են ընձեռում, կոալիցիայի մասին մեր թղթակցի հարցին չպատասխանեցին՝ նշելով, որ ՀՅԴ-ն հայտարարություն է տարածելու: Հայտարարության մեջ, սակայն, այդ մասին ոչինչ չի ասվում: Նոր Ազգային ժողովում Դաշնակցության դերակատարության ձեւաչափը, ըստ հայտարարության, կուսակցությունը քննարկելու է առաջիկա օրերին:
Փոխարենը հայտնի է, որ «Ելք» դաշինքը որեւէ դեպքում կոալիցիա չի կազմի Հանրապետական կուսակցության հետ: Ալեն Սիմոնյանն ասել է նաեւ, որ մյուս գործընկերներից դեռեւս նման առաջարկ չեն ստացել՝ նշելով, որ հազիվ թե իրենց օրակարգում կոալիցիայի հարց լինի:
Քաղաքական ուժերն արդեն քննարկում են նաեւ Երեւանի ավագանու ընտրություններին իրենց մասնակցության եւ քաղաքապետի թեկնածուների հարցը: ՀՀԿ-ն այս հարցը նույնպես քննարկելու է գործադիր մարմնի վաղվա նիստում: Սակայն Գագիկ Մինասյանն արդեն հավանական է համարում, որ Հանրապետականի թեկնածուն նորից Տարոն Մարգարյանը կլինի:
Մամուլում լուրեր են պտտվում, որ «Ծառուկյան» դաշինքից էլ քաղաքապետի թեկնածուն գործարար Խաչատուր Սուքիասյանն է լինելու: Սուքիասյանը, սակայն, մեզ հետ զրույցում հերքեց այս տեղեկությունը՝ նշելով, որ իր օրակարգում նման հարց չկա:
«Ելք» դաշինքի քաղաքապետի թեկնածուն, ամենայն հավանականությամբ, կլինի «Քաղաքացիական պայմանագիր» կուսակցության վարչության անդամ Ալեն Սիմոնյանը: Օրեր շարունակ շրջանառվում էր Նիկոլ Փաշինյանի անունը, սակայն Սիմոնյանն արդեն հերքել է այդ տեղեկությունը: Ի դեպ՝ «Ելք»-ի ցուցակով ավագանու ընտրություններին կմասնակցի նաեւ գործող ավագանու «Բարեւ Երեւան» խմբակցության անդամ Անահիտ Բախշյանը: Առաջարկել է «Ելք»-ին, այստեղ էլ սիրով համաձայնել են ու որոշել Բախշյանին ընդգրկել իրենց ընտրացուցակի առաջին տասնյակում: Խորհրդարանական ընտրություններին, հիշեցնենք, Անահիտ Բախշյանն «Ազատ դեմոկրատներ» կուսակցության ընտրացուցակում էր:
Երեւանի ավագանու ընտրությունները նախանշված են մայիսի 14-ին: Սակայն որեւէ կուսակցություն կամ դաշինք դեռեւս մասնակցության համար անհրաժեշտ փաստաթուղթ չի ներկայացրել Կենտրոնական ընտրական հանձնաժողով: Վերջնաժամկետն ապրիլի 9-ն է:
«Արմենիա» բուժկենտրոնում ապրիլի 3-ին նորածին է մահացել: Երեխայի հայրը ոստիկանություն է դիմել եւ հայտարարել, որ հիվանդանոցի բժշկուհին սխալ բուժում է նշանակել, ինչի հետեւանքով էլ փոքրիկը մահացել է: Հանրապետության գլխավոր մանկաբարձ-գինեկոլոգ Ռազմիկ Աբրահամյանը, սակայն, պնդում է, որ երեխան անհաս է ծնվել, շնչարգելություն, հեւոց, կապտություն է ունեցել: Ընտանիքը Լոռու մարզից է: Երեխայի մահվան նախնական պատճառը պարզ կլինի մի քանի օրից, երբ կստացվի դատաբժշկական փորձաքննության եզրակացությունը:
Մերձմոսկվայի Ռազվիլկա ավանում «Մերսեդեսի» բեռնախցում սպանված հայտնաբերված երկու տղամարդիկ, ամենայն հավանականությամբ, կենցաղային վեճի զոհ են դարձել: Տեղեկությունը տարածել են ռուսական լրատվամիջոցները: Ըստ աղբյուրների՝ սպանությունից մի քանի ժամ առաջ մեքենայի տիրոջ դպրոցական տարիների ընկերուհին խնդրել է իրեն պաշտպանել ծանոթից: Սպանվածներից Հայաստանի 36-ամյա քաղաքացի Խորեն Մարգարյանն Աբխազիայից 39-ամյա Միքայել Լալայանի հետ գնացել է կնոջ տուն եւ սպասել կռվարարին: Սակայն վերջինը զինված է եկել: Նա գնդակահարել է Խորենին եւ Միքայելին, դիակները տեղավորել «Մերսեդեսի» բեռնախցի մեջ, ապա կնոջն իր տանելով՝ անհայտ ուղղությամբ փախուստի դիմել: Ոստիկանները որոնում են մարդասպանին ու կնոջը:
Պետերբուրգում իրականացված ահաբեկչությունից հետո Երեւանի մետրոպոլիտենի բոլոր կայարաններում հսկողությունն ուժեղացվել է: Մետրոպոլիտենի մամուլի քարտուղարի խոսքով՝ որոշումը կայացրել է Երեւանի ոստիկանությունը: Իրավապահները ստուգում են կասկածելի մարդկանց պայուսակները, ուսումնասիրում տեսանկարահանող սարքերի ձայնագրությունները: Ապրիլի 3-ին Սանկտ Պետերբուրգի մետրոյի «Սեննայա հրապարակ» եւ «Տեխնոլոգիական ինստիտուտ» կայարանների միջեւ պայթյուն տեղի ունեցավ։ Եվս մեկ նախապատրաստվող պայթյուն՝ այս անգամ «Ապստամբության հրապարակ»-ում, հաջողվեց կանխել։ Վերջին տվյալներով՝ պայթյունի հետեւանքով զոհվել է 14 մարդ, 45 տուժողներ հիվանդանոցներում են։
Իրանի Խորասան-Ռեզավի նահանգում 6 մագնիտուդով երկրաշարժ է տեղի ունեցել: Ցնցումների էպիկենտրոնում 5 գյուղ է տեղակայված: Երկրի Սեյսմոլոգիական ազգային կենտրոնում չեն բացառում ստորգետնյա ցնցումների կրկնությունը: Երկրաշարժի հետեւանքով առնվազն 7 բնակավայրում ավերածություններ են եղել: Առայժմ հաղորդվում է երկու զոհի եւ մի քանի վիրավորի մասին: Աղետի գոտում փրկարարներ եւ բուժանձնակազմ է աշխատում:
Իսկ կեսգիշերն անց 4.3 մագնիտուդով երկրաշարժ է գրանցվել Ադրբեջանում: Էպիկենտրոնում ուժգնությունը կազմել է 5-6 բալ: Ցնցումները 3 բալ ուժգնությամբ զգացվել են նաեւ Արցախի Ստեփանակերտ եւ Հադրութ քաղաքներում:
Ապրիլի 5-ին դոլարն ու եվրոն ամրապնդել են դիրքերը: Արդյունքում դոլարի փոխարժեքն այսօր կազմել է 484 դրամ, եվրոյինը՝ 516, ռուբլունը՝ 8 դրամ 65 լումա, ֆունտինը՝ 604 դրամ:
Ապրիլի 6-ին հանրապետությունում սպասվում է առանց տեղումների եղանակ: Օդի ջերմաստիճանը 6-8 աստիճանով կբարձրանա: Երեւանում նույնպես տեղումներ չեն սպասվում: Մայրաքաղաքում գիշերը կդիտվի +4+6, ցերեկը՝ +18+20 աստիճան տաքություն: