Ինտերպոլի համակարգի օգտագործման չարաշահումը կքննարկվի Եվրոպայի խորհրդի Խորհրդարանական վեհաժողովի գարնանային նստաշրջանում, որը տեղի կունենա ապրիլի 24-ից 28-ը Ստրասբուրգում:
Պատգամավորները կքննարկեն Բերնդ Ֆարբրիտիուսի զեկույցը, որի հիման վրա «Ինտերպոլի համակարգի օգտագործման չարաշահումը. անհրաժեշտ են իրավական ավելի խիստ երաշխիքներ» կոչվող բանաձեւի նախագիծ է պատրաստվել:
Զեկույցում, մասնավորապես, նշված է, որ վերջին տարիներին որոշ անդամ երկրներ չարաշահել են Ինտերպոլին ծանուցելու համակարգը իրենց երկրների սահմաններից դուրս քաղաքական ընդդիմախոսներին հետապնդելու համար:
Որպես Ինտերպոլի համակարգի համանման օգտագործման օրինակ է բերվել ադրբեջանցի ընդդիմադիր Ազեր Սամադովի դեպքը, որը ստիպված էր քաղաքական հետապնդումների պատճառով երկիրը լքել: Նա առաջին անգամ ձերբակալվել է Վրաստանում, սակայն հետո Նիդեռլանդներում փախստականի կարգավիճակ է ստացել, որտեղ նույնպես խնդիրների է բախվել եւ «ելքի արգելք է» եղել Ինտերպոլի «կարմիր ծանուցման» պատճառով: Նրա անունը քարտադարանից հանվել է միայն 8 տարի հետո, եւ նա կարողացել է ազատ տեղաշարժվել:
Զեկույցում բերվում է նաեւ բլոգեր Ալեքսանդր Լապշինի օրինակը: «Ճանապարհորդ բլոգեր Ալեքսանդր Լապշինը, որը ռուսական, ուկրաինական եւ իսրայելական անձնագրեր ունի, Մինսկում ձերբակալվել է 2016-ի դեկտեմբերի կեսին՝ կարմիր ծանուցմանը համապատասխան, որի հայտը Ադրբեջանը ներկայացրել է 2011 եւ 2012 թվականներին Լեռնային Ղարաբաղ նրա այցերից հետո, որոնք նա մեկնաբանել է իր բլոգում»,- նշված է զեկույցում: