Բացի Հայ առաքելական եկեղեցուց, Վրաստանում գործում են բազմաթիվ այլ եկեղեցիներ դրանցից ոչ մեկը, սակայն, վրացական իշխանությունների կողմից չի ճանաչվել եւ կարգավիճակ չունի։ Վրաստանում պաշտոնապես ճանաչված է միայն վրաց ուղղափառ եկեղեցին։ NEWS.am-ի թղթակցի հետ զրույցում այս մասին հիշեցրեց «Ջավախք» հայրենակցական միության նախագահ Շիրակ Թորոսյանը՝ անդրադառնալով Վրաստանի ռեինտեգրացիայի եւ իրավունքի պաշտպանության փոխնախարար Ելենա Թեւդորաձեի այն հայտարարությանը, թե Վրաստանը երբեք չի ճանաչի եւ կարգավիճակ չի տա Հայ առաքելական եկեղեցուն։
«Հայ առաքելական եկեղեցու կարգավիճակի հարցը Վրաստանի անկախացումից ի վեր բարձրացվում է տեղի հայ համայնքի կողմից, սակայն հարցը միշտ բախվում է վրացական իշխանությունների կոշտ դիրքորոշմանը։ Հատկանշական է,սակայն, այն, որ Վրաստանի նույն գերատեսչության նախարար Թեմուր Յակոբաշվիլին որոշ ժամանակ առաջ հայտարարել էր, որ առաջիկայում պետք է մշակվի եւ խորհրդարանի օրակարգ ներառվի Վրաստանում բնակվող ազգային փոքրամասնություններին իրենց կրոնական կազմակերպությունները գրանցելու իրավունքի մասին օրինագիծը։ Այժմ, երբ Վրաստանի ռեինտեգրացիայի եւ իրավունքի պաշտպանության փոխնախարարը տրամաբանորեն հակառակ միտքն է հայտնում, դա նշանակում է, որ պետական պաշտոնյաների հայտարարությունների մեջ հակասություն կա, չի հասունացել ազգային փոքրամասնությունների իրավունքների պաշտպանության հարցը։ Գլխավորը, սակայն, այն է, որ այս ամենը տեսնելով՝ արեւմտյան հովանավորները Վրաստանը շարունակում են դիտել իբրեւ ժողովրդավարական երկիր։ Այնինչ, դեմոկրատիայի առաջին գրավականը մարդու իրավունքների պաշտպանությունն է, ինչը Վրաստանում ամեն օր ոտնահարվում է»,- հաոզմունք հայտնեց Շիրակ Թորոսյանը։