Սիրիայի «Շայրաթ» ավիաբազային ԱՄՆ-ի հրթիռային հարձակումը վնաս է հասցրել ահաբեկչական կազմակերպությունների դեմ պայքարին։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, հաղորդում է Lenta-ն։
«Մենք արդեն չգիտենք՝ ինչպիսի նպատակներ է հետապնդել Վաշինգտոնը՝ այդ հարվածների մասին որոշում ընդունելով, բայց միանշանակ է այն փաստը, որ հարվածները փաստացի բխում են ԻՊ-ի («Իսլամական պետություն»), «Ջաբհաթ ան-Նուսրա»-ի եւ այլ ահաբեկչական կազմակերպությունների շահերից», —հայտարարել է Պեսկովը։
Կրեմլի ներկայացուցիչը նաեւ մատնանշել է այն, որ ԱՄՆ նախագահ Դոնալդ Թրամփի գործողությունները հակասում են նրա նախընտրական խոստումներին։
«Նա միջազգային ահաբեկչության դեմ պայքարը, ԻՊ-ի դեմ պայքարը հռչակում էր որպես իր գլխավոր նպատակներից մեկը՝ այդ թվում շեշտը դնելով նաեւ միջազգային լիարժեք կոալիցիայի ձեւավորման վրա։ Ամեն ինչի ճիշտ հակառակը տեղի ունեցավ»,- հայտարարել է Պեսկովը։
