Երեւանի ավագանու ընտրությունների հիմնական մրցակիցներն արդեն հայտնի են: Նախօրեին ՀՀԿ-ն հայտարարեց, որ իրենց ցուցակը գլխավորելու է գործող քաղաքապետ Տարոն Մարգարյանը: 

 Այսօր «Ելք» դաշինքի ցուցակը գլխավորելու մտադրության մասին հայտնեց Նիկոլ Փաշինյանը, ընդ որում, վերըտրված պատգամավորը դա արեց իրեն հատուկ ոճով` օգտագործելով քաղաքական քարոզչության նոր գործիքները` սելֆիսթիքին ամրացված հեռախոսով՝ ֆեյբուքյան ուղիղ եթերում:

Փաշինյանի թեկնածության հարցը, ըստ երեւույթին, վերջին պահին է որոշվել: Դեռ օրվա առաջին կեսին «Ելքը» հայտարարել էր, որ հնարավոր է՝ Զարուհի Փոստանջյանը լինի իրենց թեկնածուն, ավելի ուշ, սակայն, պարզվեց, որ Փոստանջյանը մերժել է այդ առաջարկը:

Ըստ էության, քաղաքապետի համար մրցապայքարը հիմնականում կծավալվի այս երկու թեկնածուների միջեւ: «Բարգավաճ Հայաստանը» դեռ չի կողմնորոշվել` կմասնակցի ընտրություններին, թե ոչ: Ամենայն հավանականությամբ, մրցապայքարի մեջ չի մտնի նաեւ Հայ ազգային կոնգրեսը, Դաշնակցությունը, Ազատ դեմոկրատներն էլ արդեն հայտարարել են, որ չեն մասնակցի: Փաստաթղթերի ներկայացման վերջնաժամկետը ապրիլի 9-ն է: Քարոզարշավը կմեկնարկի ապրիլի 21-ին, իսկ ընտությունները տեղի կունենան մայիսի 14-ին:

«Կոնգրես–ՀԺԿ» դաշինքը խորհրդարանական ընտրություններից հետո առաջին անգամ է եկել հայտարարությամբ: Ըստ դաշինքի` ապրիլի 2-ին կայացած ընտրություններն անցել են իշխանության կողմից զանգվածային իրավախախտումներով, այդ թվում սահմանադրության խախտմամբ ընտրությունների անցկացման օրը նշանակելը, ընտրակաշառքի բաժանումը, ընտրողների ահաբեկումը, զանգվածային վերագրանցումները, տեղամասերում տեսախցիկների միջոցով ինտերնետային հեռարձակման դադարեցումը, կրկնակի քվեարկությունը: Դաշինքը որոշել է բողոքարկել ընտրությունների օրինականությունը եւ բողոք է ներկայացնելու ԿԸՀ եւ Սահմանադրական դատարան: 

Կարեն Կարապետյանի թիրախում կրկին Արման Սահակյանն է: Վարչապետին բարկացրել են Պետական գույքի կառավարման վարչության ներկայացրած ցուցանիշները: Պարզվում է` պետական մասնակցությամբ առեւտրային 194 կազմակերպությունների շահութաբերությունը շատ ցածր է` 1,2 տոկոս: Կարեն Կարապետյանը բոլոր նախարարներին հանձնարարել է ստուգել իրենց ենթակայության տակ գտնվող կազմակերպությունների շահութաբերությունը, անհույս ղեկավարներին հեռացնել, անհույս կազմակերպությունները սեփականաշնորհել, մնացածի շահութաբերությունը մեծացնելու առաջարկներ ներկայացնել: 

Սիրիայում վերջին օրերին իրավիճակը կտրուկ սրվել է: Այս գիշեր Միացյալ Նահանգները հրթիռային հարված է հասցրել Սիրիային: Հոմս նահանգում գտնվող կառավարական օդուժի ավիաբազայի վրա միանգամից 59 հրթիռ է արձակվել, ինչի հետեւանքով առնվազն 9 խաղաղ բնակիչ է զոհվել: Դոնալդ Թրամփն ասուլիս է տվել, որում բացատրել է`ինքն է հրաման արձակել հարվածել  այն ավիաբազային, որտեղից, ըստ ամերիկյան հետախուզության տվյալների, մի քանի օր առաջ քիմիական զենք էր կիրառվել, ինչի հետեւանքով մոտ 80 մարդ էր մահացել Սիրիայի Իդլիբ նահանգում: Թեեւ Սիրիայի նախագահ Բաշար Ասադը հերքում է իր առնչությունը ենթադրյալ քիմիական հարձակմանը, Վաշինգտոնում վստահ են, որ հենց նա է դրա նախաձեռնողը: Նշենք, որ սա աննախադեպ է, քանի որ մինչեւ հիմա ԱՄՆ կողմից ղեկավարվող կոալիցիոն ուժերը Սիրիայում հարձակման թիրախ էին  դարձնում միայն Իսլամական պետության դիրքերը` ձեռք չտալով Ասադի զորքերին: Կարելի է ասել, որ սրանով  Սիրիայում ամերիկյան միջամտության նոր փուլ է սկսվում: Թրամփը, ըստ էության, անցավ այն սահմանը, որը չէր անցնում Բարաք Օբաման եւ սահմանափակվում էր միայն սիրիական ընդիմությանն աջակցելով: 

 Եվրոպական երկրները, Թուրքիան, Սաուդիան Արաբիան եւ Իսրայելը աջակցություն են հայտնել Միացյալ Նահանգներին, դատապարտել են միայն Ռուսաստանը եւ Իրանը: Մոսկվան հայտարարել է, որ ԱՄՆ գործողությունները Սիրիայում գործող ահաբեկչական խմբավորումների շահերից են բխում եւ դադարեցրել է Սիրիայում ավիացիայի թռիչքների անվտանգության վերաբերյալ՝ ԱՄՆ-ի հետ կնքված հուշագրի գործողությունը: Կրեմլը ընդգծել է, որ հրթիռային հարվածը բացասաբար կանդրադառնա Մոսկվայի եւ Վաշինգտոնի առանց այն էլ լարված հարաբերությունների վրա:

Ֆրանսիայի նախագահի թեկնածու Ֆրանսուա Ֆիյոնի վրա ալյուր են շաղ տվել։ Դեպքը տեղի է ունեցել Ստրասբուրգում: Նա մարդկանց բազմության միջով քայլում էր  դեպի բեմահարթակ,  երբ անհայտ անձը վազելով մոտեցել է նրան, եւ փաթեթի ալյուրը շաղ տվել վրան՝ նրան անվանելով «լոբբիստ»: Ֆիյոնին մոտենալու համար տղամարդը ձեւացրել է, թե նրա աջակիցներից է, հագել է վերնաշապիկ, որի վրա գրված է եղել՝ «Ուսանողները սատարում են Ֆիյոնին»: 

Մերձմոսկվայում մահացած  հայտնաբերված երկու հայերի սպանության մեջ կասկածվում է ՀՀ քաղաքացի։ 35-ամյա տղամարդու անունը չի հաղորդվում, նրան այսօր ձերբակալել են։ Ըստ Ռուսաստանի քննչական կոմիտեի՝  հանցագործությունը տեղի է ունեցել վիճաբանության հետեւանքով։ Հիշեցնենք, որ սպանվածներից մեկը Հայաստանի քաղաքացի է, մյուսը` Աբխազիայի, նրանց հայտնաբերել էին ապրիլի 3-ին մեքենայի բեռնախցիկում:

Սուրբ Զատկի տոնից առաջ Տնտեսական մրցակցության պաշտպանության հանձնաժողովը սկսել է ուսումնասիրել ձվի շուկան, ձվի պահանջարկի աճի հետ կապված հնարավոր գնաճը հայտնաբերելու եւ կանխելու նպատակով:  Շաբաթական երեքանգամյա մոնիթորինգի փոխարեն` հանձնաժողովի անդամները առաջիկա երեք օրերին շուկան ուսումնասիրելու են ամեն օր: Այս պահի դրությամբ հավկիթի գինը մարտի համեմատ չի փոխվել, փոխարենը Հայաստանում թանկացել է շաքարավազը: 1 տարվա ընթացում գինը բարձրացել է մոտ 15 տոկոսով, մինչդեռ միջազգային շուկայում նման դինամիկա չկա, ավելին՝ տարվա սկզբի համեմատ՝ մարտին շաքարի գինը միջազգային շուկայում նվազել է 21 տոկոսով: Այնուամենայնիվ Տնտեսական մրցակցության պաշտպանության հանձնաժողովը այս շուկան ուսումնասիրելու մտադրություն առայժմ չի ցուցաբերում:

Ապրիլի 7-ին՝ Մայրության եւ գեղեցկության տոնի առթիվ «Զվարթնոց» ժամանած բոլոր կանաց դիմավորել են ծաղիկներով:Սա ավանդական միջոցառում է, որը ամեն տարի կազմակերպում է Երեւանի քաղաքապետարանը:

Ծաղիկներ են ստացել նաեւ Երեւանի կին վարորդները, անցորդները:

Դոլարի փոխարժեքն աննշան աճել է՝ կազմելով 485 դրամ, եվրոն, ռուբլին եւ ֆունտը էժանացել են՝ կազմելով համապատասխանաբար 516, 8.52, 603 դրամ։ 

 Հանրապետության տարածքում ապրիլի 8-ին սպասվում է անձրեւ, օդի ջերմաստիճանը էապես չի փոխվի: Երեւանում երեկոյան ժամերի նույնպես սպասվում է անձրեւ: Մայրաքաղաքում գիշերը կդիտվի +8+10, ցերեկը՝ +18+20 աստիճան տաքություն: