ԱՄՆ նախագահ Դոնալդ Թրամփն ու Չինաստանի նախագահ Սի Ցզինպինը ավելի վաղ կայացած հանդիպման ընթացքում քննարկել են Սիրիայի իրավիճակը։ Այս մասին ապրիլի 8-ին հայտնել է Չինաստանի ԱԳՆ պաշտոնական ներկայացուցիչ Լու Կանը։
Երկու պետությունների առաջնորդները հանդիպել էին ապրիլի 6-7-ը Ֆլորիդայում։ Ապրիլի 7-ին կայացել են Դոնալդ Թրամփի ու Սի Ցզինպինի բանակցությունները, որոնք տեւել են ավելի քան յոթ ժամ։
«Հանդիպման ընթացքում նախագահները անդրադարձել են նաեւ Սիրիայի հարցին։ Սի Ցզինպինը բացատրել է չինական մշտական դիրքորոշումը՝ երկիրը դեմ է քիմիական զենքի կիրառմանը։ Նա շեշտել է, որ հիմա առաջնահերթ խնդիր է իրավիճակի հետագա բարդացումը կանխելը, խնդրի քաղաքական կարգավորման գործընթացը պաշտպանելու համար առավելագույն ջանքեր գործադրելը»,- ասել է Լու Կանը, փոխանցում է ՌԻԱ Նովոստին։