Նոր խորհրդարանն իր աշխատանքները կսկսի ապրիլի 27-ից, եթե «Կոնգրես-ՀԺԿ» դաշինքը ընտրությունների արդյունքները չբողոքարկի Սահմանադրական դատարանում: Այս մասին, այսօր՝ ապրիլի 10-ին, Ազգային ժողովում լրագրողների հետ զրույցում նշել է ՀՀ ԱԺ աշխատակազմի ղեկավար, սահմանադրագետ Հրայր Թովմասյանը:
Նրա խոսքով, եթե Սահմանադրական դատարան բողոքարկումը լինի, անկախ նրանից, թե ինչ որոշում կկայացնի ՍԴ-ն, նոր խորհրդարանի առաջին նիստը չի լինի ապրիլի 27-ին:
Թովմասյանը նշեց, որ ՍԴ բողոքարկումը պետք է լինի ապրիլի 14-ին, մինչեւ ժամը 18.00-ն: Դրանից հետո 15 օրվա ընթացքում (մինչեւ ապրիլի 29-ը) ՍԴ-ն պետք է որոշում կայացնի: Եթե որոշումը կայացնի հենց այդ օրը, ապա դրանից հետո երրորդ հինգշաբթի օր՝ մայիսի 18-ին տեղի կունենա նոր ԱԺ առաջին նիստը:
«Եթե ՍԴ-ն որոշում կայացրեց ապրիլի 29-ից ավելի շուտ, ասենք ապրիլի 21-ին, ապա դրանից հետո պետք է հաշվարկել 3-րդ հինգշաբթի օրը»,-ասաց նա ու հավելեց. «Կառավարությունը նոր Սահմանադրության ուժով ԱԺ առաջին նիստի օրը հրաժարական է տալիս, իր լիազորությունները վահր է դնում: Դրանից հետո 10 օրվա ընթացքում կնշանակվի նոր վարչապետ: Դրանից հետո 20 օրվա ընթացքում (դրանք առավելագույն ժամկետներն են) կձեւավորվի կառավարություն, եւս 20 օրվա ընթացքում կառավարությունը կներկայացնի իր ծրագիրը: Ազգային ժողովը արտահերթ ռեժիմում 5-օրյա ժամկետում կքննարկի այդ ծրագիրը»,-ընդգծեց Թովմասյանը:
