«Կոնգրես-ՀԺԿ»-ն վիճարկում է ապրիլի 2-ի խորհրդարանական ընտրությունների արդյունքները. դաշինքն այսօր Սահմանադրական դատարան է դիմել: Սա նշանակում է, որ նոր գումարման Ազգային ժողովի լիազորություններն օրինական ուժի մեջ կմտնեն ոչ թե ապրիլի 27-ին, այլ մայիսին, ամենաուշը՝ 18-ին: Դաշինքի ներկայացուցիչ Արամ Մանուկյանը նշել է, որ իրենց դիմումի հիմքում երեք հանգամանք կա՝ վարչական ռեսուրս, ընտրակաշառք եւ քվեարկության ընթացքի վերահսկողություն: Սահմանադրական դատարանը պետք է առավելագույնը 15 օրվա ընթացքում քննի դիմումը:

«Օհանյան-Րաֆֆի-Օսկանյան» դաշինքն էլ Վարչական դատարան հայցադիմում էր ներկայացրել Կենտրոնական ընտրական հանձնաժողովի որոշման դեմ: ՕՐՕ-ն ԿԸՀ էր դիմել՝ պահանջելով ընտրական տեղամասերում հատուկ սարքերով ձեռք բերված մատնահետքերը միավորել մեկ ընդհանուր բազայում ու համեմատական վերլուծություն անցկացնել: Ուզում էին պարզել, արդյո՞ք կա մատնահետքերի համընկնում: Վարչական դատարանը մերժել է դաշինքի հայցադիմումը:

Իսկ երեկ երեկոյան համացանցում հրապարակված եւ մեծ աղմուկ բարձրացրած ձայնագրությունը հասել է իրավապահ մարմիններին: Խոսքը «ՍԱՍ» գրուպի աշխատակիցների հետ անցկացված նախընտրական ժողովի ձայնագրության մասին է: Հավաքը վարողն աշխատակիցներին պարտադրում է ձայներ բերել ՀՀԿ-ի տարածքային թեկնածու Արտակ Սարգսյանի օգտին՝ խոստանալով, որ շատ ձայներ բերողները կպարգեւատրվեն, իսկ չբերողները կպատժվեն՝ ընդհուպ աշխատանքից ազատում: Գլխավոր դատախազությունը սկսել է ուսումնասիրել ձայնագրությունը:

Վահրամ Բաղդասարյանն այսօր լրագրողներին ասել է, որ տեղյակ չէ ձայնագրության մանրամասներից, բայց վստահեցրել է, որ այն կուսումնասիրվի: Դրանից հետո միայն, Բաղդասարյանի խոսքով, հնարավոր կլինի ասել, արդյո՞ք դա հիմք կհանդիսանա, որ Արտակ Սարգսյանը վայր դնի պատգամավորական մանդատը:

Մայիսի 2-ից ՀԱՊԿ գլխավոր քարտուղարի պաշտոնը կստանձնի Յուրի Խաչատուրովը: Որոշումը կայացվել է Բիշքեկում, ՀԱՊԿ անդամ պետությունների ղեկավարների ոչ պաշտոնական հավաքի ժամանակ: Կազմակերպության նախկին գլխավոր քարտուղար Նիկոլայ Բորդյուժան էլ պարգեւատրվել է ՀԱՊԿ հավաքական անվտանգության խորհրդի գերազանցության I աստիճանի նշանով:

Իսկ ԵՏՄ անդամ պետությունների ղեկավարները Բիշքեկում հավաքվել են՝ Եվրասիական տնտեսական բարձրագույն խորհրդի նիստի: Հավաքին մասնակցել է նաեւ ԵՏՄ անդամ չհանդիսացող Մոլդովայի նախագահը: Այս երկիրն ընտրել է Եվրամիությանն ինտեգրվելու ուղին, սակայն ռուսամետ գործիչ Իգոր Դոդոնը նախագահ ընտրվելուց հետո հայտարարեց երկու ճակատով համագործակցություն կառուցելու մասին, ինչի համար արժանացավ երկրի ընդդիմության քննադատությանը: Մոլդովան նույնիսկ ԵՏՄ-ում դիտորդ-պետության կարգավիճակ ստանալու մասին դիմում է ներկայացրել: Կառույցում քննարկել են դիմումն ու հավանության արժանացրել:

Նիստի ընթացքում նշվել է, որ վերջնական փուլում են նաեւ Իրանի հետ ազատ առեւտրի գոտու համաձայնագրի ստորագրման աշխատանքները: Երրորդ երկրների հետ ինտեգրացիոն միավորումը, Հայաստանի նախագահի համոզմամբ, կնպաստի ԵՏՄ-ի միջազգային դիրքերի ամրապնդմանը: Սերժ Սարգսյանը կարեւորում է հատկապես Իրանի հետ համագործակցությունը: Սերժ Սարգսյանը խոսել է նաեւ համաշխարհային տնտեսական բարդ իրավիճակի մասին, որի պայմաններում էլ ձեւավորվում եւ զարգանում է եվրասիական ընդհանուր տնտեսական տարածքը: Բայց դա նպաստել է առավել սերտ համագործակցությանը:

Նիստի ընթացքում Վլադիմիր Պուտինն առաջարկել է ԵՏՄ հաջորդ գագաթնաժողովն անցկացնել հոկտեմբերին՝ Մոսկվայում: Առաջարկվել է նաեւ հերթական նիստում քննարկել ԵՏՄ ներքին շուկայում սահմանափակումներն ու խոչընդոտները:

Սեւանում ողբերգական դեպք է տեղի ունեցել: Նախօրեին Արծվանիստ գյուղի 46-ամյա բնակիչը նավակով Սեւանա լիճ է մտել եւ չի վերադարձել. լճում դատարկ նավակն են գտել:Այսօր առավոտյան քաղաքացու դին հայտնաբերել են:

Արծվանիստի գյուղապետը մեր թղթակցի հետ զրույցում նշել է, որ տղամարդը մտածված է նետվել նավակից: Նախկինում նույնպես նա ինքնասպանության փորձ արել է, սակայն հարազատներին հաջողվել է կանխել: Գյուղապետը պատմել է, որ տղամարդը մի քանի հիվանդություն ուներ: Նա երկու որդի ունի, որոնցից մեկը բանակում է ծառայում, մյուսը Ռուսաստանում է:

Սիսիանում էլ խորհրդավոր դեպք է տեղի ունեցել: 61-ամյա տղամարդու դի են հայտնաբերել՝ դեմքն ու պարանոցը հոշոտված: Մահացածի հայրը ոստիկաններին հայտնել է, որ որդուն գտել է խոզերի համար նախատեսված վանդակում՝ դեմքի ու պարանոցի հատվածը հոշոտված: Դատաբժշկական փորձաքննություն է նշանակվել:

Սոցիալական ցանցերում այս օրերին տարածվել է #KeepThePromise հեշթեգը: Հոլիվուդյան աստղերն ու այլ հայտնիներ իրենց աջակցությունն են հայտնում Հայոց Ցեղասպանության մասին «Խոստում» ֆիլմի տարածմանը: Ռեժիսոր Թերի Ջորջի ֆիլմը մի քանի ամիս է՝ կինոյի ոչ միայն հայ, այլեւ համաշխարհային երկրպագուների ուշադրության կենտրոնում է: Ֆիլմում նկարահանվել են հոլիվուդյան աստղեր Օսկար Այզեքը, Քրիստիան Բեյլը, Շարլոտ Լը Բոնը, ինչպես նաեւ հայ դերասանուհի Անժելա Սարաֆյանը: Ֆիլմի երաժշտության հեղինակը Սերժ Թանկյանն է, իսկ պրոդյուսերներից մեկը՝ Քըրք Քըրքորյանը:

Լոս Անջելեսում կայացած պրեմիերային բազմաթիվ աստղեր են մասնակցել: Հայկական արմատներով աշխարհահռչակ երգչուհի Շերը հայտնել է, թե, իր կարծիքով, մեծ տերություններն ինչու չեն ճանաչում Հայոց ցեղասպանությունը. «Մենք փոքր երկիր ենք: Հայաստանը դեպի ծով ելք չունի: Մենք նավթ չունենք: Մենք նրանց տալու ոչինչ չունենք: Չի կարելի մտածել, որ նրանք դա կանեն իրենց բարության շնորհիվ»:

Հոլիվուդյան դերասանուհի Նինա Դոբրեւն էլ պրեմիերայից առաջ հայտարարել է. «Խոստանում եմ պայքարել հանուն Ցեղասպանության ճանաչման եւ պահել խոստումը: Այս շատ կարեւոր ֆիլմը պատմում է միլիոնավոր մարդկանց կյանքերի կորստի մասին»:

Դոլարի ու եվրոյի վերելքը կանգ առավ: Դոլարի փոխարժեքն այսօր կազմել է 486 դրամ, եվրոյինը՝ 516, ռուբլունը՝ 8 դրամ 65 լումա, ֆունտինը՝ 608 դրամ:

Ապրիլի 15-ին հանրապետության շրջանների մեծ մասում ժամանակ առ ժամանակ սպասվում է անձրեւ եւ ամպրոպ: Երեւանում նույնպես վաղը տեղումներ կլինեն: Մայրաքաղաքում գիշերը կդիտվի +8+10, ցերեկը՝ +16+18 աստիճան տաքություն: