Տավուշի մարզում Գոշի լճում որեւէ շինություն չի կառուցվելու. լճի տարածքում իրականացված աշխատանքների վերաբերյալ կատարվում է ծառայողական քննություն: Այս մասին, այսօր՝ ապրիլի 15-ին, լրագրողների հետ զրույցում նշել է ՀՀ բնապահպանության նախարար Արծվիկ Մինասյանը՝ անդրադառնալով նրան, որ «Դիլիջան» ազգային պարկի տարածք ծանր տեխնիկա է մտցվել, հարթեցվել ու լայնացվել է դեպի Գոշ լիճ տանող ճանապարհը:
Նախարարի խոսքով, այն, ինչ կատարվել է «Ռենդոռ» կազմակերպության կողմից, «Դիլիջան» ազգային պարկի տնօրինության եւ բնապահպան ակտիվիստների կողմից կասեցվել է. «Նշանակել ենք ծառայողական քննություն «Դիլիջան» ազգային պարկում, թե ինչու համապատասխան պահակային ծառայությունները աշխատակիցները ժամանակին չեն նկատել այդ գործողությունը: Առաջիկա օրերի ընթացքում կբացահայտենք պատճառը, եւ այդ մարդիկ, ովքեր ներգրավված են այդ գործողություններում, պատասխանատվության կենթարկվեն»:
Արծվիկ Մինասյանը վստահեցրեց, որ Գոշի լճի տարածքում մշտական շինություն չի կառուցվի, էկոլոգիային վնաս պատճառող, կերուխում ասված երեւույթը կբացառվի:
Ավելի վաղ NEWS.am-ը հայտնել էր, որ ըստ «Ռենդոռ» ընկերության հետ կնքած պայմանագրի` կառուցապատման իրավունք ունեցող անձը պարտավոր է բարեկարգել տարածքը, մաքրել աղբից եւ չոր ճյուղերից, չխախտել լճի էկոհամակարգը եւ էնդեմիկ կարգավիճակը: Գոշ լճի հարակից տարածքներում նախատեսված աշխատանքները կատարվելու են համաձայն «Վենդոռ» ՍՊ ընկերության հետ կնքված պայմանագրով հաստատված ծրագրի` բնապահպանական փորձաքննություն անցնելուց հետո:
