ՆԱՏՕ-ում չեն մեկնաբանում Թուրքիայում սահմանադրական հանրաքվեի արդյունքներն ու այն համարում թուրք ժողովրդի ներքին գործը։ Այս մասին «ՌԻԱ Նովոստի»-ին ասել է Բրյուսելում՝ դաշինքի գլխավոր գրասենյակում գտնվող աղբյուրը։
Կիրակի օրը Թուրքիայում տեղի ունեցած սահմանադրական հանրաքվե՝ կառավարման նախագահական համակարգի անցնելու վերաբերյալ ավարտվեց դրա հաղթանակով։ Նախնական տվյալներով՝ նոր սահմանադրությունը հավաքել է ձայների 51,2 տոկոսը։
«Թուրքիայում սահմանադրական հանրաքվեն թուրք ժողովրդի գործն է։ Ես ձեզ խորհուրդ կտայի դիմել Թուրքիայի իշխանություններին», - ասել է անհայտ մնալ ցանկացող աղբյուրը։
Ինչպես կարծում են միջազգային փորձագետները՝ ապրիլի 16-ին Թուրքիայում տեղի ունեցած սահմանադրական հանրաքվեն, որն ավարտվեց սահմանադրական բարեփոխումների հաղթանակով, հերթական քայլն է՝ ուղղված Թուրքիայում նախագահ Ռեջեփ Թայիփ Էրդողանի բռնապետությունը հաստատելուն։ Հանրաքվեն տեղի է ունեցել Էրդողանի քաղաքական հակառակորդների զանգվածային ձերբակալությունների ֆոնին։