Թուրքիայում կարող են զանգվածային բողոքներ սկսվել: Ապրիլի 17-ին՝ լրագրողների հետ հանդիպման ժամանակ այս մասին ասաց Հայաստանի ԳԱԱ Արեւելագիտության ինստիտուտի տնօրեն, թուրքագետ Ռուբեն Սաֆրաստյանը:
Նրա խոսքով՝ Թուքիայում բախումները ոչ միայն կանխատեսելի են, այլեւ սպասելի: «Մենք տեսանք, որ խոշոր քաղաքների բնակիչները սահմանադրական բարեփոխումներին դեմ են քվեարկել: Բացառված չէ, որ Թուրքիայում կարող են զանգվածային բողոքներ սկսվել, ինչպես եղավ Գեզի այգու շուրջ իրադարձությունների դեպքում»,- ընդգծեց Սաֆրաստյանը՝ հավելելով, որ Թուրքիան իրականում կանգնել է ավտորիտարիզմի ճանապարհին, որը շատ է սահմանափակում ժողովրդավարական կառավարման արեւմտյան համակարգի հաստատման հնարավորությունները:
Նշենք, որ Թուրքիայում հեռավոր շրջաններում գերազանցության հաշվին ապրիլի 16-ին կայացած երկրի նախագահական կառավարման ձեւի անցման վերաբերյալ սահմանադրական բարեփոխումների հանրաքվեում հաջողվել է հաղթել աննշան 2 տոկոսի առավելությամբ: Միջազգային փորձագետների կարծիքով՝ սա երկրում Ռեջեփ Թայիփ Էրդողանի անսանձելի բռնատիրության հաստատմանն ուղղված հերթական քայլն է: Հանրաքվեն ընթացել է Էրդողանի քաղաքական հակառակորդների շարունակվող զանգվածային կալանավորումներով: Այսուհանդերձ, սահմանադրական բարեփոխումների հակառակորդները նույնիսկ պաշտոնական տվյալներով հաղթել են երկրի 3 խոշոր քաղքներում՝ Անկարայում, Ստամբուլում եւ Իզմիրում: