Շուրջ 4 ամիս առաջ Գեղարքունիքի մարզի դատարան ուղարկված՝ Վարդենիսի քաղաքապետի նկատմամբ բնակիչներից մեկի կողմից բռնություն գործադրելու գործով նիստերն անընդհատ հետաձգվել են:
Դեկտեմբերի սկզբին դատարան ուղարկված գործով 4 նիստ է նշանակվել, որոնք հետաձգվել են տարբեր պատճառաբանություններով: Նշենք որ գործով ամբաստանյալ Իվան Տկաչենկոն իրեն առաջադրված մեղադրանքը չի ընդունում: Ըստ նրա փաստաբան Տիգրան Աբրահամյանի՝ քաղաքապետարանի աշխատակիցները ծաղրել են նրան, ինչից հետո բարկացել է, մտել քաղաքապետի մոտ, սակայն որեւէ բռնություն չի գործադրել, նույնիսկ վիճաբանություն չի եղել:
Ըստ մեղադրական եզրակացության` Տկաչենկոն հոկտեմբերի 26-ին Վարդենիսի քաղաքապետի աշխատասենյակում վիճաբանության մեջ է մտել իշխանության ներկայացուցիչ Վոլոդյա Խլոյանի հետ եւ բռնություն գործադրել վերջինիս նկատմամբ: Նրան մեղադրանք է առաջադրվել Քրեական օրենսգրքի 316-րդ հոդվածի 1-ին մասով, խափանման միջոց է ընտրվել ստորագրություն չհեռանալու մասին:
