Թուրքիայում ապրիլի 16-ին անցկացված սահմանադրական փոփոխությունների հանրաքվեի արդյունքներն արդեն հայտնի են. քվեարկությանը մասնակցած քաղաքացիների 51.2%-ը, հրապարակված տվյալների համաձայն, կողմ է քվեարկել նախագահ Էրդողանի առաջարկած սահմանադրական փոփոխություններին, դեմ է հանդես եկել 48.8%-ը:
Երկրի ընդդիմությունն ու միջազգային կազմակերպությունները, սակայն, արդեն հայտարարել են ընտրությունների ընթացքում եւ քվեաթերթիկների հաշվարկի ժամանակ խախտումների մասին: Ակտիվորեն քննարկվում է հատկապես Թուրքիայի Կենտրոնական ընտրական հանձնաժողովի սկանդալային որոշումը: Հանձնաժողովի որոշմամբ՝ փոփոխություններին կողմ քվեարկված, բայց չկնքված քվեաթերթիկները վավեր է ճանաչել: Ընդդիմությունը զայրացած է. «Ժողովրդահանրապետական» կուսակցության ղեկավար Քեմալ Քըլըչդարօղլուն հայտարարել է, որ չեն ընդունում նման արդյունքը:
Մեծ արձագանք են գտել նաեւ թուրքական Anadolu-ի հրապարակած տվյալները: Գործակալությունը 99.9% քվեաթերթիկների հաշվարկման եւ 51.2% կողմ ձայնի մասին հայտնել է, երբ հաշվարկված չի եղել թերթիկների անգամ 90%-ը: Հետաքրքիր է, որ նույնիսկ պաշտոնական տվյալներով խոշոր քաղաքներում, այդ թվում՝ Ստամբուլում, Անկարայում եւ Իզմիրում, հաղթել են փոփոխությունների հակառակորդները:
Քվեարկության էր դրվել Թուրքիայի սահմանադրության 18 կետի փոփոխություն, որոնցից հիմնակաները հետեւյալն են. պատգամավորների թիվը 550-ից դառնում է 600, պատգամավոր ընտրվելու համար տարիքային շեմը 25-ից իջեցվում է 18-ի, նախագահի դեմ հետաքննություն սկսելու համար անհրաժեշտ է լինելու 301 պատգամավորի քվե, նախագահը կարող է չճանաչել ընտրությունների արդյունքներն ու նոր քվեարկություն նշանակել: Թուրքական ընդդիմությունն ու միջազգային փորձագետները շեշտում են, թե սահմանադրական փոփոխություններով Էրդողանը միանձնյա կառավարելու իրավունք է ստանում:
Իսկ հանրաքվեի արդյունքների հրապարակումից հետո Էրդողանը հայտարարել է, որ իր հաջորդ քայլը լինելու է մահապատժի վերականգնումը: Եթե պատգամավորները չսատարեն նախաձեռնությունը, Թուրքիայի նախագահը պատրաստվում է օրինագիծ մշակել եւ այն հանրաքվեի դնել:
Պաշտոնական Փարիզը հայտարարել է, որ մահապատժի վերականգնումը կնշանակի եվրոպական արժեքներից հեռացում: Ժողովրդավարական արժեքներից ու Եվրոպայի չափանիշներից հեռանալու մասին են նշել նաեւ Ավստրիայում, իսկ Գերմանիայի արտգործնախարարը հայտարարել է, որ ուրախ է հանրաքվեի նախընտրական քարոզչության ավարտի կապակցությամբ: Զիգմար Գաբրիելի բնորոշմամբ՝ դաժան նախընտրական պայքար էր տարվում, այդ թվում՝ Գերմանիայում:
Բելգիայի արձագանքն ավելի կտրուկ է. Դաշնային խորհրդարանի ստորին պալատի պատգամավորներից մեկն առաջարկել է թուրքերին զրկել Բելգիայի հպատակությունից: Խորհրդարանականի խոսքով՝ թուրքերի կեսից ավելին քվեարկել է ավտորիտար համակարգի օգտին, եւ հարկավոր է վերջ դնել երկքաղաքացիությանը: Սահմանադրական փոփոխություններին կողմ է քվեարկել Բելգիայի թուրքերի 77.1%-ը:
ԵԱՀԿ-ն կարծում է, որ ընտրողներն օբյեկտիվ տեղեկություն չեն ստացել բարեփոխումների գլխավոր կողմերի մասին, իսկ քվեարկության ընթացքն անցել է կողմերի համար անհավասար պայմաններում եւ չի համապատասխանել Եվրախորհրդի չափանիշներին: Իսկ ՆԱՏՕ-ն որոշել է չեզոք դիրքորոշում որդեգրել՝ հայտարարելով, որ չեն ցանկանում մեկնաբանել Թուրքիայի Սահմանադրական հանրաքվեի արդյունքներն ու այն համարում են թուրք ժողովրդի ներքին գործը:
Լոռու մարզի Շամլուղի հանքավայրում արտակարգ դեպք է տեղի ունեցել: Հանքաքարը պոկվել ու ընկել է աշխատողներից 41-ամյա Աղբալ Առաքելյանի վրա: Առաքելյանը մարմնական վնասվածքներով տեղափոխվել է նախ Ալավերդու հիվանդանոց, իսկ հետո՝ Երեւան: Բժիշկները նրա վիճակը ծայրահեղ ծանր են գնահատում: Աղբալ Առաքելյանն Ախթալայի լեռնահարստացուցիչ կոմբինատում որպես հորատանցող է աշխատում:
Արարատի մարզում տեղի ունեցած ավտովթարից հետո մեքենան այրվել է: Այնթապ գյուղի կամրջի մոտակայքում «Volkswagen» մակնիշի ավտոմեքենան դուրս է եկել ճանապարհի երթեւեկելի հատվածից, բախվել Հյուսիս-Հարավ նորակառույց ճանապարհին տեղադրված բետոնե արգելապատնեշին: Մեքենայում հրդեհ է բռնկվել, իսկ վարորդը՝ 25-ամյա Կարեն Առաքելյանը, մարմնական վնասվածքներով հիվանդանոց է տեղափոխվել: Ավտոմեքենան ամբողջությամբ այրվել է:
Ապրիլի 16-ին քրիստոնյա աշխարհը նշեց Քրիստոսի հրաշափառ Հարության տոնը: Երուսաղեմում Քրիստոսի Հարության տաճարում իջեցվել է Բարեշնորհ կրակը: Համարվում է, որ եթե կրակը չի իջեցվում, դա վկայում է աշխարհի վերջի մասին: Հազարավոր մարդիկ են հավաքվել մատուռում՝ ականատես լինելու Զատկի հրաշքին: Երուսաղեմից մեր թղթակիցը հաղորդում է, որ կրակը հայտնվել է Տիրոջ գերեզմանի ներսի մատուռում, քարե դամբարանի վրա, որի վրա Ավագ Շաբաթ դրված է եղել Քրիստոսի մարմինը: Երուսաղեմի Թեոֆիլոս պատրիարքը կրակը փոխանցել է հավատացյալներին, որից էլ վառել են 33 մոմերի հանգույցները` Քրիստոսի տարիքին համապատասխան:
Դոլարը կրկին փոքր-ինչ թանկացել է: Ապրիլի 17-ին ամերիկյան արժույթի փոխարժեքը կազմել է 486 դրամ, եվրոյինը՝ 519, ռուբլունը՝ 8 դրամ 71 լումա, ֆունտինը՝ 612 դրամ:
Ապրիլի 18-ի գիշերն առավելապես առանց տեղումների եղանակ կլինի, իսկ ցերեկը շրջանների մեծ մասում սպասվում է անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվի: Երեւանում վաղը երեկոյան ժամերին կարճատեւ տեղումներ կլինեն: Մայրաքաղաքում գիշերը կդիտվի +9+11, ցերեկը՝ +21+23 աստիճան տաքություն: