ՀՀ նախկին վարչապետ Հովիկ Աբրահամյանը կարծում է, որ խորհրդարանական ընտրություններն անցել են առանց խախտումների:
Այսօր՝ ապրիլի 17-ին, լրագրողները Հովիկ Աբրահամյանից հետաքրքրվել են, թե ինչպես է գնահատում ապրիլի 2-ին կայացած ընտրությունները:
«Որեւէ մեկը չի ասում, որ ընտրախախտում է եղել, որեւէ քաղաքական ուժ կա՞, որ ասում է, թե եղել է ընտրախախտում: Անկեղծ ասած, ես զբաղվել եմ միայն Արարատի մարզով, որտեղ իմ որդին էր առաջադրված, մեծ մասշտաբով ընտրություններին չեմ մասնակցել, որեւէ լուրջ խախտում կամ որեւէ դեպք չեմ լսել, որը կարող է ազդեցություն ունենալ ընտրությունների արդյունքների վրա»,- ասաց նա:
Հիշեցնենք, որ Հովիկ Աբրահամյանի որդին՝ Արգամ Աբրահամյանը, առաջադրվել էր Արարատի մարզում «Ծառուկյան» դաշինքի տարածքային ցուցակով: Նա հաղթահարել է անցողիկ շեմը եւ կլինի նոր խորհրդարանում: Արգամ Աբրահամյանը հայտարարել է արդեն, որ հրաժարվելու է Արտաշատի քաղաքապետի պաշտոնից եւ վերցնելու է պատգամավորական մանդատը:
