«Երկիր Ծիրանի» կուսակցության հիմնական թիրախը լինելու է Հանրապետական կուսակցությունը։ Այս մասին այսօր՝ ապրիլի 18-ին, լրագրողների հետ հանդիպման ժամանակ նշել է կուսակցության ղեկավար Զարուհի Փոստանջյանը:
«Մեր թիրախը լինելու է ՀՀԿ-ն եւ Տարոն Մարգարյանը։ Մենք գալիս ենք հենց իրենց հեռացնելու այս քաղաքական ասպարեզից, որովհետեւ այդ կուսակցության ներքո են տեղի ունեցել այն գործողությունները, որոնք բացարձակ խոցելի են դարձրել Հայաստանը», - հայտարարեց Փոստանջյանը։
Ինչ վերաբերում է Երեւանի ավագանու ընտրություններին մասնակցող մյուս ուժին՝ «Ելք» դաշինքին, Փոստանջյանն ասաց. «Ելք» դաշինքում ընդգրկված են անձինք, որոնց անձնապես ճանաչում եմ, եւ այդ մարդկանց հետ հնարավորություն կունենանք ինչ-որ հարցերի շուրջ համագործակցել, բայց պետք է ասեմ, որ մենք գնում ենք վերցնելու քաղաքապետարանը»:
Հարցին, թե ի՞նչ երաշխիք, որ չեն կեղծվի ընտրությունները, «Երկիր Ծիրանիի» նախագահը պատասխանեց. «Դուք գիտեք, որ ես 9 տարի եղել եմ փաստաբան, պաշտպանել եմ մարդկանց, որոնց իրավունքները ոտնահարվել են իշխանությունների կողմից: Նույնիսկ եթե ցմահ ազատազրկման են դատապարտվել, դա չի նշանակում, որ քո իրավունքների համար չպետք է պայքարես, երբ թվում է, թե ոչինչ հնարավոր չէ անել: Միշտ կա հնարավորություն թե հաղթելու, թե նվաճումներ ունենալու: Եթե քաղաքականության մեջ ես, պետք է ցանկացած գործընթաց օգտագործես, որ քո ծրագիրը հասնի հաղթանակի: Եթե չես մասնակցում, պասիվ ես մնում, հաղթանակի հասնելը բացառվում է»:
Նրա խոսքով, միայն քաղաքական հայտ ներկայացնելու դեպքում՝ կարելի է հաջողության հասնել. «Մենք պետք է հասկանանք, որ պետք է դառնանք քաղաքական ազգ, եւ միայն քաղաքական հայտի ներքո դու կարող ես բանեցնել քաղաքականություն: Կյանքը ցույց է տալիս, որ ամեն ինչ քաղաքականություն է եւ պետք է մասնակցել բոլոր քաղաքական գործընթացներին»:
Նշենք, որ Երեւանի ավագանու ընտրությունները կայանալու են մայիսի 14-ին, որին մասնակցում են երեք ուժեր՝ ՀՀԿ-ն, որի քաղաքապետի թեկնածուն Տարոն Մարգարյանն է, «Ելք» դաշինքը, որի քաղաքապետի թեկնածուն Նիկոլ Փաշինյանն է, եւ «Երկիր Ծիրանի» կուսակցությունը, որի թեկնածուն Զարուհի Փոստանջյանն է:
