Թուրքիայի սահմանադրական հանրաքվեի արդյունքները խորացրեցին թուրք հասարակության բեւեռացումը։ Նման կարծիք է հայտնել թուրքագետ Լեւոն Հովսեփյանը՝ Հայաստան-Թուրքիա հեռուստակամուրջի ընթացքում։
Նրա խոսքով՝ նախորդ ընտրություններում էլ կար ձայների մասնատման պատկերը։ Այս անգամ առանձնահատկությունն այն է, որ իշխող «Արդարություն ու զարգացում» կուսակցությունը՝ ներկայացնելով սահմանադրական փոփոխությունների փաթեթը «ձախողվեց» Անկարայում ու Ստամբուլում։ «Նախկինում այդ քաղաքներն աջակցում էին իշխող կուսակցությանը։ Կեսից ավելի մեծ քաղաքներում չեն աջակցել իշխող կուսակցությանը։ Միջերկրածովյան ու քրդաբնակ շրջանները դեմ են քվեարկել»,-նշել է փորձագետը։ Նրա խոսքով՝ մեծ նշանակություն ունի, որ միջերկրածովյան շրջաններում բնակչությունն ավելի առաջադեմ է։ Քրդերի դիրքորոշումը պայմանավորված է թուրքական իշխանությունների կտրուկ քաղաքականությամբ։
«Ընդհանուր պատկերը հանգեցրել է թուրք հասարակության բեւեռացման խորացմանը։ Դա կարտացոլվի երկրի քաղաքական ու հասարակական կյանքում», - նշել է Լեւոն Հովսեփյանը։
