Հայաստանի համար ավելի լավ է Թուրքիայի հետ հարաբերությունների բացակայությունը: Հայաստան-Թուրքիա տեսակամուրջի ժամանակ այսպիսի տեսակետ հայտնեց «Ակօս» թերթի հայկական բաժնի խմբագիր Բագրատ Էստուկյանը:
«Առաջին անգամ կարծում եմ, որ դա ավելի դրական է: Իհարկե, Հայաստանի անկախացման պահից ի վեր ավելի լավ կլիներ, որ երկու երկրների միջեւ նորմալ հարաբերություններ լինեին: Բայց քանի որ բարիդրացիական չեն, ավելի լավ է ոչ մի հարաբերություն էլ չլինի: Եվ թող մնա՝ ինչպես այսօր է»,- կարծում է Էստուկյանը:
Միեւնույն ժամանակ, նա արձանագրեց, որ Հայաստանի եւ Թուրքիայի միջեւ շփումներ կան հանրության մակարդակում, մտավորականության, ակադեմիական շրջանակների միջեւ: «Բայց քաղաքական եւ դիվանագիտական հարաբերություններ չկան, եւ սա Հայաստանի համար լավ է: Սահմանների բացումը կարող է տարբեր նշանակություն ունենալ: Մենք հույս ունեինք, որ սահմանների բացումը 2 հասարակությունների համար բարիք կլինի: Սակայն Թուրքիան ավելի ու ավելի վտանգավոր երկիր է դառնում, այնպես որ՝ ավելի լավ է նրանից հեռու մնալ»,- նշեց Էստուկյանը: