Մայիսի 14-ին կայանալիք Երեւանի ավագանու ընտրություններին «Հանրապետական» կուսակցությունը մասնակցում է «Հանուն Երեւանի» կարգախոսով; Այս մասին NEWS.am-ին ասաց կուսակցության կազմակերպչական հանձնաժողովի նախագահ Ռուբեն Թադեւոսյանը։
Թե ինչ միջոռացմամբ է մեկնարկելու իշխող կուսակցության քարոզարշավը, դեռեւս չի բացահայտվում:
Ընտրություններին մասնակցող մյուս քաղաքական ուժի՝ «Ելք» դաշինքի կարգախոսը հետեւյալն է՝ «Երեւան ջան, ելք կա»: Դաշինքն այժմ տեսահոլովակ է նկարահանում, որտեղ երգելու է նաեւ դաշինքի համամասնական ցուցակը գլխավորող Նիկոլ Փաշինյանը: «Ելքն» արդեն իսկ հայտարարել է նաեւ, թե ինչ է նախատեսվում ապրիլի 21-ին. Մոսկովյան, Իսահակյան և Տերյան փողոցներին հարող հատվածից մեկնարկող երթը կավարտվի Հյուսիսային պողոտա - Տերյան խաչմերուկին հարող տարածքում, որտեղ կկայանա հավաք և համերգ:
«Երկիր Ծիրանին» առայժմ փակագծերը չի բացում: Ինչպես այսօր արդեն հայտարարել է կուսակցության առաջնորդ Զարուհի Փոստանջյանը, կարգախոսը կհայտնեն ապրիլի 21-ին:
Նշենք, որ Երեւանի քաղաքապետի ընտրություններին մասնակցում է երեք քաղաքական ուժ. ՀՀԿ-ի համամասնական ցուցակը գլխավորում է գործող քաղաքապետ Տարոն Մարգարյանը, «Ելք»-ինը՝ պատգամավոր Նիկոլ Փաշինյանը, իսկ «Երկիր Ծիրանինը»՝ Զարուհի Փոստանջյանը: