Ռուսաստանը կշարունակի հնարավոր ամեն ինչ անել Մերձավոր Արեւելքում եւ Աֆրիկայի հյուսիսում քրիստոնյաներին հարձակումներից պաշտպանելու համար: Այս մասին ՌԴ ԱԳ նախարար Սերգեյ Լավրովը հայտարարել է ուղղափառների Զատիկի առիթով նախարարությունում կազմակերպված ընդունելության ժամանակ, փոխանցում է «ՌԻԱ Նովոստի»-ն:
Նրա խոսքով՝ Մերձավոր Արեւելքում եւ Աֆրիկայի հյուսիսում իրավիճակի անկայունությունը մեծագույն հարված է այնտեղ ապրող քրիստոնյաների համար, որոնք «ծայրահեղականների կողմից ցեղասպանության են ենթարկվում»: «Քրիստոնեական տոնի օրը եգիպտական Թանթայի եւ Ալեքսանդրիայի հավատացյալների դեմ իրականացված հանդուգն հանցագործությունները ուղղված են միջդավանաբանական կոտորած հրահրելուն»,- ասել է Լավրովը:
«Այսուհետեւ եւս հնարավոր ամեն ինչ կանենք քրիստոնյաների վրա հարձակումները եւ միջքաղաքակրթական ու միջկրոնական պատճառներով ջարդերը կանխելու համար»,- ընդգծել է նա:
Նախարարը նշել է, որ այս խնդրի լուծմանն է ուղղված ապրիլի 7-ին Տաշքենդում ընդունված ԱՊՀ երկրների ԱԳ նախարարների համատեղ հայտարարությունը քրիստոնյաների, մուսուլմանների եւ այլ դավանանքների ներկայացուցիչների նկատմամբ խտրականության եւ անհանդուժողականության անթույլատրելիության մասին: «Կարծում ենք, որ այս որոշումը ԵԱՀԿ-ին կդրդի, որը դեռեւս 2014 թվականին է որոշել, մշակել քրիստենաատյացության եւ իսլամատյացության դեմ բանաձեւեր: Մինչ օրս այս պարտավորությունը չի կատարվել»,- նշել է Լավրովը:
