Եվրոպական երկրների կառավարությունները պետք է ավելի շատ ջանքեր գործադրեն Միջերկրական ծովը հատող միգրանտներին պաշտպանելու համար։ Այս մասին հայտնել են ՄԱԿ-ի փախստականների հարցերով վարչությունում։ Անցած շաբաթվա վերջին ձկնորսներից մեկը մոտ հարյուր միգրանտների է փրկել։
«Նրանք առնվազն ութ ժամ մնացել էին բաց ծովում։ Հինգը զոհվել են, եւս մեկը մահացավ ափ հանելուց հետո։ Պայմանները, որոնց մեջ հայտնվում են այդ մարդիկ մաքսանենգների պատճառով, սարսափ են առաջացնում»,- ասել է Միգրացիայի հարցերով միջազգային կազմակերպության ներկայացուցիչ Լեոնարդ Դոուլը։
Նրա խոսքով, մոտ 20 հազար միգրանտ ազատազրկման մեջ է՝ մաքսանենգների հսկողության տակ։ Հանցագործները մարդկանցից խլում են փողը, իսկ նրանց ուղարկում ծով խարխլված նավակներով։ Տարեսկզբից մինչեւ հիմա ծովում 900 միգրանտ է զոհվել։ Նրանց 90 տոկոսը՝ Լիբիայից Իտալիա երթուղու վրա։
