Վրաստանում 2016 թվականին ներդրումների զուտ ներհոսքը 3 անգամ ավելի է եղել քան Հայաստանում: Այս մասին, այսօր՝ ապրիլի 19-ին, լրագրողների հետ հանդիպման ժամանակ նշել է ՀՀ տնտեսական զարգացման եւ ներդրումների փոխնախարար Հովհաննես Ազիզյանը:
Նրա խոսքով, դա պայմանավոված է ճանաչելիության խնդրով, ինչպես նաեւ նրանով, որ Հայաստանի տնտեսությունը լուրջ ազդեցություն է կրում Ռուսաստանից: «Ռուսաստանի տնտեսության միտումներն ազդեցություն են թողել Հայաստանի վրա։ Ժամանակավոր առումով, այո բացասական ազդեցություն է ունեցել։ Վրաստանի համար հիմնական ներդրող երկրները Թուրքիան ու Ադրբեջանն են, իսկ Հայաստանի համար եղել են Ռուսաստանը, Եվրամիությունը, իսկ այդ երկրներում ներդրումները նվազել են ճգնաժամով պայմանավորված։ Այդուհանդերձ, ներկա փուլում զգում ենք լուրջ հետաքրքրություն եւ Ռուսաստանի, եւ ԵՄ-ի եւ տարածաշրջանի երկրների կողմից»,-ընդգծեց Ազիզյանը:
