Ռուսաստանը կողջուներ Հավաքական անվտանգության պայմանագրի կազմակերպության համագործակցությունն Աբխազիայի հետ։ Այս մասին հայտարարել է ՌԴ ԱԳՆ ղեկավար Սերգեյ Լավրովը՝ Աբխազիայի նախագահ Ռաուլ Խաջիմբայի հետ մամուլի ասուլիսի ժամանակ, հաղորդում է «ՌԻԱ Նովոստի»-ն։
«Եթե խոսենք Հավաքական անվտանգության պայմանագրի կազմակերպության մասին, մենք կողջունեինք այդ կառույցի համագործակցությունն Աբխազիայի հետ։ Լիիրավ անդամի կարգավիճակ ստանալու համար անհրաժեշտ է այս կամ այն կազմակերպության մեջ մտնող բոլոր պետությունների կոնսենսուսը, նույն բանը վերաբերում է նաեւ դիտորդի կարգավիճակին։ Այստեղ տարբերություն չկա, այստեղ կարեւոր է, որ որոշմանն աջակցեն այս կամ այն կառույցի բոլոր մասնակիցները», — ասել է նա։
«Եթե խոսում ենք ՀԱՊԿ-ի մասին, այդ կազմակերպությունը կոչված է ապահովել դրան անդամակցող բոլոր երկրների անվտանգությունը։ Աբխազիայի Հանրապետության անվտանգությունն ամենահուսալի կերպով ապահովված է ու երաշխավորված այն հարաբերություններով, որոնք ամրակցված են Ռուսաստանի Դաշնության՝ Աբխազիայի Հանրապետության հետ միջպետական պայմանագրերում։ Եւ այն որոշակի միջոցառումներով, որոնք ՌԴ զինված ուժերը Աբխազիայի զինված ուժերի հետ համագործակցությամբ կիրառում են առօրյա երաշխիքներն ապահովելու համար՝ արտաքինից ագրեսիվ ակտերի չկրկնվելու նպատակով», — ասել է նա։
