2016 թվականին Հայաստանում 16912 ամուսնություն է գրանցվել։ Այս մասին լրագրողների հետ հանդիպման ժամանակ ապրիլի 19-ին հայտարարել է Ազգային վիճակագրական ծառայության մարդահամարի ու ժողովրդագրության բաժնի պետ Կարինե Կույումջյանը։
Նրա խոսքով՝ ամենաբարձր ցուցանիշը գրանցվել է 2011-ին՝ 19706 ամուսնություն։ «2012 թվականին գրանցվել է 19 հազար ամուսնություն, իսկ վերջին 4-5 տարում ցուցանիշը նվազել է», - նշել է Կույումջյանը։
Խոսելով ամուսնալուծությունների մասին՝ նա ընդգծել է, որ ամենաբարձր ցուցանիշը գրանցվել է 2014 թվականին՝ 4496։ 2015-2016 թվականներին, համաձայն Կարինե Կույումջյանի, նվազել է ինչպես ամուսնությունների, այնպես էլ ամուսնալուծությունների թիվը։ Նա հավելել է, որ Հայաստանում ամուսնալուծությունների ամենաբարձր ցուցանիշը գրանցվել է Լոռու մարզում։