Սիրիայի վրա հրթիռային հարձակումից հետո ԱՄՆ-ն կարծես այնքան էլ հակված չէ խնդիրը մինչեւ ռազմական խոշոր բախման հասցնելուն: Ապրիլի 19-ին այս մասին լրագրողներին ասաց արտակարգ եւ լիազոր դեսպան, փորձագետ Արման Նավասարդյանը՝ պատասխանելով NEWS.am-ի այն հարցին, թե հնարավո՞ր է Վաշինգտոնի նոր հարձակում, եւ դա ինչպե՞ս կանդրադառնա ռուս-ամերիկյան հարաբերությունների վրա:
Նրա խոոսքով՝ դա ցույց է տվել նաեւ Հյուսիսային Կորեայի նկատմամբ ամերիկյան քաղաքական գիծը: «Շատ մեծ դեր է խաղում խնդրի հռետորաբանական մասը: Հյուսիսային Կորեան հանդես է գալիս սպառնալիքներով, ԱՄՆ նախագահ Դոնալդ Թրամփը սպառնում է, սակայն այս սպառնալիքները մնում են օդում կախված: Այստեղ կարեւորն այլ բան է՝ նման իրավիճակը կարո՞ղ է լայնամասշտաբ բախման հանգեցնել: Կարծում եմ, որ նման բան տեղի չի ունենա: Սակայն հաշվի առնելով ներկայիս քաղաքական իրավիճակը, միջազգային հարաբերությունների ֆոնին ուժերի հարաբերակցությունը, կարող է մեծ վտանգ ներկայացնել որեւէ մի պետության կամ քվազի պետության պատահական որեւէ քայլը»,- նշեց Նավասարդյանը՝ շարունակելով, որ ԱՄՆ-ը Ռուսաստանին չի հարվածի՝ շատ լավ հասկանալով դրա հետեւանքները: «Դա չի անի նաեւ Ռուսաստանը: Բայց ի՞նչ երաշխիքներ կան, որ «Իսլամական պետություն» խմբավորումը չի կիրառի իր մոտ եղած սպառազինությունը»,- ընդգծեց Արման Նավասարդյանը:
Հիշեցնենք, որ ապրիլի 7-ի գիշերը ԱՄՆ-ը հրթիռային հարված է հասցրել Սիրիայի ավիաբազայի վրա: ԱՄՆ Նախագահ Դոնալդ Թրամփը հայտարարել է, որ հրաման է տվել հարվածել ավիաբազային, որտեղից է կատարվել, նրա խոսքով, Իդլիբի նահանգի վրա քիմիական հարձակումը: Մինչեւ հիմա Վաշինգտոնը Սիրիայի ղեկավարության կողմից քիմիական զենքի կիրառման որեւէ ապացույց չի ներկայացրել:
