Հանրապետական կուսակցության մամուլի խոսնակ Էդուարդ Շարմազանովը NEWS.am–ի հետ զրույցում հայտարարել է, թե քանի դեռ Արտաշատի քաղաքապետ Արգամ Աբրահամյանը հրաժարական չի տվել քաղաքապետի պաշտոնից, չեն կարող Արտաշատի քաղաքապետի թեկնածուի հարց քննարկել։

Նշենք, որ Արգամ Աբրահամյանը խորհրդարանական ընտրություններում «Ծառուկյան» դաշինքից առաջադրվել էր Արարատի մարզում եւ ստացելէ 34 հազար 415 քվե։ Նախնական տեղեկություններով՝ նա հրաժարական է տալու քաղաքապետի պաշտոնից եւ տեղափոխվելու է խորհրդարան։ Մինչ հրաժարականը՝ արդեն իսկ տեղեկություններ կան, որ Հովիկ Աբրահամյանը, այսպես ասած, չի հանձնելու հայրենի Արտաշատը եւ որդուն փոխարինելու համար նախապատրաստում է մորաքրոջ որդու՝ Արտաշատի փոխքաղաքապետ Գագիկ Պողոսյանի թեկնածությունը։

Արտաշատում ինտրիգը ՀՀԿ–ի մասնակցության հարցն է։ Արդյո՞ք ՀՀԿ–ն այստեղ թեկնածու կառաջադրի, թե Արտաշատը կթողնեն, Հովիկ Աբրահամյանի ղեկավարման ներքո։

«Արտաշատը թողնելու ենք արտաշատցիներին, Երեւանը՝ երեւանցիներին, Ալավերդին՝ ալավերդցիներին, Մարտունին՝ մարտունեցիներին... երբ որ ժամանակը կգա, տեղի մարզային կառույցի կարծիքը կլսենք, տարածքային կառույցների կարծիքը կլսենք, կքննարկենք եւ մեր որոշումը կկայացնենք։ Հանրապետական կուսակցությունը ամեն ինչ քննարկում է ժամանակին, այսօր Արգամ Աբրահամյանը քաղաքապետ է, դե ֆակտո եւ դե յուրե։ Երբ որ Արգամ Աբրահամյանը հրաժարական կտա, կդառնա պատգամավոր, Կենտրոնական ընտրական հանձնաժողովը կհայտարարի առաջադրվելու ժամկետները, կուսակցությունը կքննարկի։ Քանի դեռ Արտաշատը ունի գործող քաղաքապետ, կուսակցության օրակարգում չկա նման հարց»,–ասաց Էդուարդ Շարմազանովը։

Արարատի ՀՀԿ կառույցի ղեկավար Ալիկ Սարգսյանը նույնպես սվստահեցրեց, թե դեռ խորհուրդը չի քննարկել թեկնածուի հարցը։