Հայ համայնքը Սերբիայում սիրված է եւ մեծ հարգանք է վայելում: Այս մասին, ապրիլի 19-ին, Գարեգին Բ Ամենայն հայոց կաթողիկոսի հետ հանդիպման ժամանակ նշել է Հայաստանի Հանրապետությունում Սերբիայի Հանրապետության նորանշանակ արտակարգ եւ լիազոր դեսպան Դուշան Սպասոեւիչը (նստավայրը` Աթենք):
Մայր աթոռից NEWS.am-ին հայտնում են, որ վեհափառ Հայրապետը, շնորհավորելով դեսպանին նշանակման առիթով, կարեւորեց երկու երկրների միջեւ հարաբերությունների եւ գործակցության ընդլայնումը: Նորին Սրբությունն անդրադարձավ երկու ժողովուրդների պատմական առնչություններին, ինչպես նաեւ Հայաստանյայց Առաքելական եւ Սերբ Ուղղափառ Եկեղեցիների եղբայրական կապերին: Այս առիթով Ամենայն Հայոց Կաթողիկոսը դեսպանի միջոցով իր բարեմաղթանքներն ու ողջույնները փոխանցեց Սերբ Ուղղափառ Եկեղեցու պետ Իրենեոս Պատրիարքին:
Դեսպան Դուշան Սպասոեւիչը եւս իր խոսքում անդրադարձ կատարեց երկու ժողովուրդների պատմական կապերին եւ ընդհանրություններին` Նորին Սրբությանը տեղեկություններ փոխանցելով Սերբիայի հայկական համայնքի մասին: Այս կապակցությամբ դեսպանն ընդգծեց, որ հայ համայնքը Սերբիայում սիրված է եւ մեծ հարգանք է վայելում:
Զրույցի ընթացքում խոսվեց նաեւ երկու Եկեղեցիների առջեւ ծառացած արդի մարտահրավերների եւ դրանց հաղթահարմանն ուղղված ջանքերի մասին:
Հանդիպման ավարտին Վեհափառ Հայրապետն իր բարեմաղթանքները բերեց նորանշանակ դեսպանին` ցանկանալով նրան արգասաբեր գործունեություն:
Հանդիպմանը ներկա էր Մայր Աթոռի Արտաքին հարաբերությունների եւ արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը: