Տրանսպորտային ոլորտում սպասվում է լավ որակի մեքենաների եւ տրանսպորտի սպասարկման ոլորտի բարձրացում: Այս մասին այսօր՝ ապրիլի 20-ին, կառավարության նիստից հետո լրագրողների հետ զրույցում ասաց ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը: Նա նշեց, որ վարչապետի հետ քննարկվել է տրանսպորտային ոլորտին «հեղափոխական լուծում տալու հարցը»:
«Անցած շաբաթ վարչապետն այցելեց մեր նախարարություն, քննարկվեց տրանսպորտի ոլորտի, այսպես ասած, հեղափոխական լուծում տալու հարցը, քանի որ այսօր տրանսպորտային ոլորտը չի բավարարում բնակիչներին: Առաջարկություններ են ներկայացվել նոր տրանսպորտային համակարգ ստեղծելու վերաբերյալ եւ մինչեւ հունիսի 1-ը կներկայացնենք տեխնիկական առաջադրանք, դրանից հետո կմշակվի տրանսպորտային նոր համակարգը եւ ըստ դրա արդեն կաշխատենք: Ինչ վերաբերում է ներդրումներին, չափ չենք կարող ասել, որովհետեւ դեռ չգիտենք, թե ինչ կարգի պահանջներ ենք ներկայացնելու իրենց: Լավ որակի մեքենաներ եւ սպասարկման որակի բարձրացում է լինելու»,-ասաց նա:
Վահան Մարտիոսյանն անդրադառնալով ճանապարհների վերականգման խնդրին, նշեց, որ մեծ ներդրումներ են հարկավոր, սակայն, անհրաժեշտ ֆինանսական միջոցներ դեռ չկան:
Վահան Մարտիրոսյանը նշեց, որ Հայաստանում ճանապարհների վերանորոգման համար հարկավոր է 100 միլիարդ դրամ, այսինքն, դատելով այդ թվից, կարելի է ասել, որ բոլոր ճանապարհներն էլ անմխիթար վիճակում են: Նրա խոսքով, ճանապարհների 20 տոկոսը մոտավորապես լավ վիճակում են, 25-30-ը՝ բավարար, մնացածը՝ վատ:
«Ճանապարհները բարելավելու համար մեծ ներդրումներ են հարկավոր: Այն տարածքները որտեղ հնարավոր է ալտերնատիվ ճանապարհներ կառուցել առանց ներդրումների, կկառուցվեն: Այնպիսի գյուղերը, որտեղ հոսքը շատ չէ, հնարավոր է այլընտրանքային ճանապարհներ կառուցել»,-ասաց նա:
