Ընտրություններից առաջ ոչ թե պետությունն է ասֆալտ անում, այլ հնարավոր է՝ կոնկրետ մարդիկ: Այս մասին այսօր՝ ապրիլի 20-ին, կառավարության նիստից հետո լրագրողների հետ զրույցում ասաց ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
«Ընտրություններից առաջ ասֆալտ անելու հետ ես այնքան էլ համաձայն չեմ: Դա կարող է կոնկրետ մարդիկ են անում, բայց պետությունը միշտ ժամանակին է անում ասֆալտապատումը: Հիմա կոնկրետ փոսալցման աշխատանքներն են սկսվել: Փոսալցումներից բացի, կատարվելու են նաեւ հիմնանորոգման աշխատանքներ: Այդ աշխատանքների մրցույթներն արդեն կամփոփվեն եւ կհայտարարվի նոր մրցույթ ճանապարհների հիմնանորոգման աշխատանքների համար: Ինչ վերաբերում է վարկային ծրագրերին, դրանք շարունակվում են: Մրցույթը հայտարարված է: Մրցույթները բաց են, ցանկացած ժամանակ ցանկացած մարդ կարող է մասնակցել մրցույթի արդյունքները տեսնելու համար»,-ասաց նա:
Նախարարը նաեւ նշեց, որ մինչեւ մայիսի վերջ շահագործման կհանձնվեն նաեւ Հյուսիս-հարավ ճանապարհի կամուրջների տակի ճանապարհները. «Մինչեւ մայիսի վերջ կբացվի կամուրջների տակի երթեւեկությունը, իսկ մինչեւ սեպտեմբերի վերջ՝ կամուրջների վրայի»:
