Facebook-ի ստորաբաժանումներից մեկն աշխատում է տեխնոլոգիայի ստեղծման վրա, որը լսողությունից զրկված մարդկանց թույլ կտա ձայները տարբերակել մաշկի միջոցով, հայտնում է TechCrunch-ը:
Նոր մշակումների Building 8 բաժնի ղեկավար Ռեգինա Դուգանի խոսքով՝ մասնագետներն աշխատում են սարքային եւ ծրագրային լուծումների վրա, որոնք կկարողանան մարդկանց շրջապատող ձայները թրթիռների վերափոխել, որոնք այնուհետեւ հնարավոր է մաշկով «գնահատել»: Սարքի ստեղծած որոշակի հաճախականությունները ուղեղը կընկալի ուղղակիորեն առանց լսողական օրգանների կողմից թրթռումների մշակման անհրաժեշտության:
Դուգանը ապագա մշակումը համեմատել է ականջի խեցու նմանակի հետ: Նրա կարծիքով՝ համանման տեխնոլոգիաները կարելի է համեմատել Բրայլի այբուբենի կիրառման հետ:
Առաջին հրապարակային ցուցադրության ժամանակ սարքը կարողացել է վերափոխել 10 բառի եւ դրանց համադրությունների խթանները: Փորձարկվողը կարողացել է «լսել» հեռարձակվող բոլոր արտահայտությունները: