Մենք վերստուգման կենթարկենք Հայաստանի ընդերքի օգտագործման ոլորտում տրամադրված բոլոր լիցենզիաները: Ապրիլի 20-ին՝ կառավարության նիստի ժամանակ այս մասին հայտարարեց վարչապետ Կարեն Կարապետյանը:
Նրա խոսքով՝ չնայած Հայաստանի ընդերքի մասին օրենսդրության մեջ նախատեսված է ընթացիկ մոնիթորինգը, սակայն այս մոնիթորինգի անցկացման չափանիշները եւ հաշվետվությունների ներկայացման կարգը կարգավորված չեն: Ըստ վարչապետի՝ ներկայումս մոնիթորինգի տվյալների բացակայությունը հնարավորություն չի ընձեռում գնահատելու շրջակա միջավայրի վրա ընդերքի օգտագործման իրական ազդեցությունը, ինչպես նաեւ համապատասխան կանխարգելիչ միջոցառումներ ձեռնարկելու:
«Այս նպատակով էկոլոգիայի նախարար Արծվիկ Մինասյանին հանձնարարում եմ՝ եռամսյա ժամկետում, հաշվի առնելով միջազգային փորձը, մշակել եւ կառավարության աշխատակազմին ներկայացնել իրավական ակտերի փաթեթ, որոնց համաձայն կկարգավորվի մոնիթորինգի անցկացման եւ հանածոներն օգտագործողների հաշվետու լինելու հետ կապված կարգը: Մենք վերստուգման կենթարկենք տամադրված բոլոր լիցենզիաները, ներդրումների հետ կապված բոլոր պարտավորությունները: Մենք մի անգամ նրանց նախազգուշացրել ենք եւ ասել՝ մեզ ծրագրեր տվեք: Նրանք, ովքեր ծրագրեր ներկայացրել են, համաձայնության կգանք, որոշակի ժամկետներ կարձանագրենք: Նրանք, ովքեր չեն արձագանքել, շատ խիստ կխոսենք լիցենզիաները չեղարկելու վերաբերյալ»,- շեշտեց Կարեն Կարապետյանը: