Գյուղացիներին խաղողի մթերումից պարտք մնացած «Վինար» գինու գործարանի գործը գյուղնախարար Իգնատի Առաքելայանը կքննարկի վարչապետի հետ: Այս մասին այսօր`ապրիլի 20-ին, կառավարության նիստից հետո, կառավարության շենքի դիմաց հավաքված քաղցրաշենցիների հետ զրույցում ասաց գյուղատնտեսության նախարար Իգնատի Առաքելյանը:
Գյուղացիներն առաջարկեցին, որ նախարարը գինու գործարանի պարտքը կառավարության պահուստային ֆոնդից վերադարձնի, քանի որ իրենք այլեւս չեն հավատում, որ «Վինարի» տնօրենը կմարի պարտքը:
«Պարոն նախարար, որպես բարձրաստիճան ղեկավար, հարց լուծող, շրջապատի, կռուգի մարդ` չեք կարողանում ճշտել, թե Ավոյին ո՞վ բերեց կապեց մեր ջանին: Հնարավո՞ր է, որ ինձ դավերիա անեին էդ զավոդը, իհարկե չէ: Էս ղեկավարների դաբռոն ուրեմն կա, որ եկել ա: Դուք գյուղնախարարն եք, մենք մեր ապրանքը հանձնել ենք, մեր փողն ենք ուզում: Գյուղնախարարը դուք չե՞ք, ձեզի ասում ենք, առաջարկում ենք պահուստային ֆոնդից մեր փողերը տվեք»,-ասաց գյուղացիներից մեկը:
Իգնատի Առաքելյանը ասաց, որ պահուստային ֆոնդից գումար տրամադրելը անհնար է, քանի որ դա նախադեպ կդառնա մյուս գործարանների համար. «Եթե ես դիմեմ դրան, ապա նախադեպ կստեղծվի: Ցանկացած գործարար, որ փողը չտվեց, գալու եք դիմեք կառավարությանը, որ գումար հատկացնի` պարտքը մարելու համար: Այդ առաջարկը չի ընդունվելու»:
Քաղցրաշենցիները նաեւ բարձրացրին հողերի հարկի խնդիրը, որը նրանք չեն կարողանում վճարել իրենց պարտքը չստանալու պատճառով.«Ավոն ինձ փող չի տվել, Ավոն ինձ քցել ա, բա ես պետությանը ո՞նց փող տամ: Որպես գյուղացի դե ինձ ասա»:
«Ես կասեմ վարչապետին, որ այս մարդկանց պետք է գումար հատկացնենք, որովհետեւ այս մարդիկ չեն կարողանում վճարել հողի հարկ, ջրի հարկ…: Լա՞վ ա: Մենք քննարկելու ենք վարչապետի հետ այս հարցը ու մինչեւ մյուս հինգշաբթի ձեզ կզանգենք»,-ասաց գյուղնախարարը:
Վերջում գյուղացիները նախարարին առաջարկեցին.«Հիմա պարոն նախարար, որպես երկրի բարձրաստիճան ղեկավար, կպցրա` մենք մեր փողը վերցնենք, որ ուզես` կարաս: 200.000 դոլարը ինչ ա էս կառավարության համար»:
Հիշեցնենք, որ Արարատի մարզի Քաղցրաշեն գյուղի խաղողագործները 2015թ. մթերած բերքի գումարը մինչեւ օրս չեն ստացել։ Խաղողը մթերած «Վինար» ՍՊԸ-ն քաղցրաշենցիներին, ինչպես նաեւ 10 այլ գյուղերի բնակիչների պարտք է մոտ 160 միլիոն դրամ: Միայն քաղցրաշենցիներին այս պահին Վինար ընկերությունը 85 միլիոն դրամ պարտք ունի: