Անհրաժեշտ է այնպիսի որոշում գտնել, որը հարգում է ինչպես պետության ամբողջականությունը, այնպես էլ ժողովուրդների ինքնորոշման իրավունքը: Nouvelles d'Arménie-ի հետ հարցազրույցում այս մասին հայտարարել է Ֆրանսիայի նախագահի թեկնածու Էմանուել Մակրոնը:
Նրա խոսքով՝ Ֆրանսիան, որպես Մինսկի խմբի համանախագահ երկիր, աշխատում է գտնելու միջազգային իրավունքին համապատասխանող որոշում: «Հատկապես այս ելքով կլինի Ղարաբաղի որոշումն ու ճանաչումը: Մեր երկիրն այս գործընթացում պետք է կարեւոր դեր խաղա: Ես ցանկանում եմ այնպիսի լուծում գտնել, որը հարգում է պետության ամբողջականությունը եւ ժողովրդի ինքնորոշման իրավունքը: Ճանապարհը թեք է, բայց դրանով էլ է հնարավոր առաջ ընթանալ»,- հայտարարել է քաղաքական գործիչը:
Ինչ վերաբերում է ապրիլի 24-ը Ֆրանսիայի պաշտոնական օրացույցի մեջ մտցնելուն, Մակրոնը նշել է, որ սա խորհրդանշական հզոր օր է: «Ես կշարունակեմ զոհերի հիշատակը հարգելու ավանդույթը: Նաեւ հանդես եմ գալիս մեր օրացույցում Հայոց ցեղասպանության զոհերի հիշատակի օրը լինելու օգտին»,- նշել է նա:
Մակրոնն ասել է, որ Սահմանադրական դատարանի որոշումը թյուրըմբռնում է առաջացրել, Ցեղասպանության ժխտման քրեականացումը չի ընդունվել: «Համոզված եմ, որ մենք պետք է շարունակենք այս ուղղությամբ աշխատել: Պետք է օրենքն ու հիշատակը համատեղվեն»,- հայտարարել է քաղաքական գործիչը:
