ՀՀ Վերաքննիչ քրեական դատարանն այսօր՝ ապրիլի 20-ին, անփոփոխ թողեց ժամկետային զինծառայողին թեթեւ մարմնական վնասվածք պատճառելու համար լեյտենանտ Արամ Աղայանին 2,5 տարվա ազատազրկման դատապարտելու՝ առաջին ատյանի կայացրած դատավճիռը:
NEWS.am-ի թղթակիցը դատարանից հաղորդում է, որ այս վճիռը հունից հանեց Աղայանի հարազատներին:
«Զզվելի եք բայց դուք, ոչինչ Աստված էլ իրենց հարազատների նկատմամբ ըտենց դատավճիռ կանի: Կանի, հավատացեք: Արամ, հետդ ենք, դուխով եղի»,- տեղից գոռգոռում էին հարազատները:
Դատավճռի հրապարակումից հետո լրագրողների հետ զրույցում Արամ Աղայանի պաշտպան Արայիկ Պապիկյանը նշեց, որ վճռաբեկ բողոք է ներկայացնելու:
«Անկեղծորեն նման որոշման չէի սպասում, մտածում էի՝ բացի արդարադատություն իրականացնելուց, կմտածեն հայկական բանակի մասին: Այս որոշմամբ արդարադատությունն անարգանքի ենթարկվեց՝ առանց փաստակազմի, առանց հիմնավորումների, անձի նկատմամբ դաժան դատավճիռ կայացվեց»,- ասաց Արայիկ Պապիկյանը:
Փաստաբանը նշեց, որ Վճռաբեկ դատարանից ակնկալիքներ չունի, այդ ատյան դիմում է, որ հետագայում հնարավորություն ունենա ՄԻԵԴ դիմելու:
Հիշեցնենք, որ 2016թ. Նոյեմբերին Սյունիքի մարզի ընդհանուր իրավասության դատարանը լեյտենանտ Արամ Աղայանը դատապարտվել էր 2 տարի 6 ամսվա ազատազրկման: Դատարանն ապացուցված է համարել, որ 2015թ. սեպտեմբերի 7-ի լույս 8-ի գիշերը լեյտենանտ Արամ Աղայանը, տեսնելով, որ թիվ 1 պահակակետում պարեկ կարգված, շարքային Ռուդիկ Գրիգորյանը դեռ զորանոցում քնած է, գնացել է զորանոց` նրան արթնացնելու համար: Լեյտենանտը մի քանի անգամ հրելով փորձել է արթնացնել շարքայինին` հերթափոխը կատարելու համար: Զինծառայողը լեյտենանտին հարցրել է՝ ինչու է նման ձեւով արթնացնում, ինչի պատճառով Աղայանը վիճաբանել է Ռուդիկ Գրիգորյանի հետ, որի ընթացքում բռնություն է գործադրել վերջինիս նկատմամբ` քաշքշել ու հարվածել է`պատճառելով առողջության թեթեւ վնասի հատկանիշներ չպարունակող մարմնական վնասվածք:
