ԵՄ-ն դատապարտել է այն բռնությունները, որոնք գրանցվել են Վենեսուելայում՝ կառավարության կողմնակիցների ու հակառակորդների զանգվածային ակցիաների ընթացքում ու դեէսկալացիայի կոչ է արել, հայտնում է AFP–ն։
ԵՄ իշխանությունները մտահոգություն են հայտնել հակակառավարական ակցիաների երկու մասնակիցների զոհվելու, նաեւ բազմաթիվ տուժածների մասին տեղեկությունների կապակցությամբ։ Ընդ որում ԵՄ օտարերկրյա գործերով ներկայացուցիչը իր հաղորդագրության մեջ չի հիշատակել զինվորականի զոհվելու մասին, ինչի մասին տեղեկացրել էին Վենեսուելայի իշխանությունները։
ԵՄ-ն կոչ է արել հետաքննել ցուցարարների զոհվելու հանգամանքները ու բռնության ակտերը ու մեղավորներին պատասխանատվության կանչել։
Վենեսուելայի ընդդիմությունը, որը խորհրդարանում մեծամասնություն է կազմում, պահանջում է Նիկոլաս Մադուրոյի հրաժարականը։
Նախօրեին Կարակասում ու երկրի մյուս քաղաքներում հարյուր հազարավոր քաղաքացիներ են դուրս եկել փողոցներ։ Կարակասում 17-ամյա պատանին վիրավորվել էր գլխից ու մահացել։ Դրանից մեկ օր առաջ էլ 23-ամյա աղջիկ էր զոհվել՝ դարձյալ գլխի մասից ստացած վիրավորումից։ Վենեսուելայի իշխանություններն էլ հայտնել էին, որ Ազգային գվարդիայի անդամներից մեկը սպանվել է ցուցարարների կողմից Կարակասի ծայրամասում։
Նախագահ Նիկոլաս Մադուրոն հայտնել է 30 մարդու ձերբակալության մասին՝ բողոքի ակցիաների ժամանակ սադրանքներ կազմակերպելու համար։ Նրա խոսքով երկրի իշխանությունները «կանխում են ահաբեկչական պետական հեղաշրջումը», որի սցենարը ԱՄՆ-ում է մշակվել։ Վաշինգտոնն արդեն հերքել է այդ «անհիմն ու ոչ ողջամիտ» մեղադրանքները։