ՀՅԴ-ն եւ ՀՀԿ-ն շարունակում են քննարկումները կոալիցիա ստեղծելու շուրջ։ Այդ մասին այսօր՝ ապրիլի 20-ին ՀՀԿ Գործադիր մարմնի նիստից հետո լրագրողներին ասել է ՀՀԿ մամուլի քարտուղար Էդուարդ Շարմազանովը։
Նրա խոսքով, ԳՄ նիստում քննարկել են եւ շարունակում են ամփոփել խորհրդարանական ընտրությունների արդյունքները։ «Մենք ընտրատարածք առ ընտրատարածք ամփոփում ենք կուսակցականների աշխատանքը, ընտրությունների որակը»,- ասել է Շարմազանովը։
Խոսելով հնարավոր կոալիցիայի մասին՝ նա նշել է, թե քննարկումներն ընթանում է եւ «շատ-շատ հավանական է, որ ՀՀԿ-ՀՅԴ քաղաքական համաձայնությունը կստորագրվի եւ խորհրդարանում կունենանք երկու իշխանական խմբակցություն։ Դեռ նախնական է, բայց հակվածությունը ավելի շատ համագործակցության ուղղությամբ է»,- ասել է նա։
Շարմազանովը նաեւ նշել է, թե ԱԺ նախագահի, փոխնախագահների հարց ԳՄ նիստում չեն քննարկվել, շրջանառվող բոլոր անունները ժողովրդական բանահյուսության շարքից են։