ՄԱԿ ԱԽ-ն ամենավճռական ձեւով դատապարտել է ապրիլի 15-ին Հյուսիսային Կորեայում իրականացված հրթիռային արձակումը ու պահանջել երկրից «անհապաղ դադարեցնել բանաձեւերը խախտող գործողությունները» նաեւ ամբողջովին կատարել միջազգային պարտավորությունները, հայտնում է ՏԱՍՍ-ը։
Փաստաթուղթը շեշտում է Կորեական թերակղզում խաղաղություն ու կայունություն պահպանելու կարեւորությունը, արտահայտում հանձնառությունը «իրավիճակի խաղաղ, դիվանագիտական ու քաղաքական կարգավորմանը», նաեւ ողջունում երկրների ջանքերը «երկխոսության միջոցով ճգնաժամի խաղաղ ու համընդգրկուն լուծման» ուղղությամբ։
ԱԽ անդամները նախազգուշացրել են, որ ուշադիր հետեւելու են Հյուսիսային Կորեայի շուրջ իրավիճակին ու ձեռնարկելու են հետագա զգալի միջոցառումներ՝ այդ թվում պատժամիջոցներ՝անհրաժեշտության դեպքում։ ԱԽ-ն ափսոսանք է հայտնել, որ Փհենյանը ռեսուրսներ է ծախսում զենք մշակելու վրա, երբ երկրում հումանիտար ծանր վիճակ է։ ՄԱԿ-ի տվյալներով 18 մլն հյուսիսկորեացիներ զրկված են առողջ սննդակարգի հնարավորությունից։