Սանկտ Պետերբուրգի հիվանդանոցում մահացել է մետրոյում պայթյունի հետեւանքով տուժողներից եւս մեկը: Այս մասին հայտնել է փոխնահանգապետ Աննա Միտյանինան, փոխանցում է «Ինտերֆաքս»-ը:
Միտյանինան տուժողի անունը չի հաղորդել՝ հայտնելով, որ նա 1960 թվականին ծնված կին է:
Մետրոյում պայթյունի հետեւանքով զոհվածների թիվը, այսպիսով, հասել է 15 մարդու՝ չհաշված ահաբեկչին:
Ապրիլի 3-ի ցերեկը Սանկտ Պետերբուրգի մետրոյի «Սեննայա հրապարակ» եւ «Տեխնոլոգիական ինստիտուտ» կայարանների միջեւ պայթյուն է տեղի ունեցել։ Եւս մեկ պայթյուն «Ապստամբության հրապարակ»-ում հաջողվել է կանխել։ Քննության տվյալներով՝ ահաբեկչությունն իրականացրել է ծագումով Ղրղզստանից Աքբարժոն Ջալիլովը:
Պետերբուրգի մետրոյի ահաբեկչությանը մասնակցելու կասկածանքով 10 մարդ է ձերբակալվել, այդ թվում՝ Աբրոր Ազիմովը, որը, քննության կարծիքով, ահաբեկչության կազմակերպիչներից մեկն է: