«Ռոստելեկոմը» ապրիլի 20-ին, հայաստանյան անձնակազմով Ծնողազուրկ հայ երեխաների օգնության միության՝ «ՍՕԱՐ» Հայաստանի հետ համատեղ ՆորԽարբերդի մասնագիտացված մանկատան այգու տարածքում իրականացրեցին բարեկարգման աշխատանքներ։ Աշխտանքներին մասնակցում էին Ռոստելեկոմի, ՍՕԱՐ Հայաստանի եւ մանկատան աշխատակիցները։
Մասնավորապես, աշխատակիցների ջանքերով մաքրվեցին եւ ներկվեցին տարածքի փայտյա եւ երկաթյա ծածկույթները, տրամադրված նյութերով հետագայում նաեւ կմշակվեն ու կերեսապատվեն տարածքի լողավազաններն ու այլ տարածքներ։
Տարածքը ծառայում է Նոր Խարբերդի մասնագիտացված մանկատան երեխաների համար որպես զբոսանքի, վարժանքների ու հանգստի վայր, ուր տարվա տաք եղանակին շատ ժամանակ են անցկացնում։ Համատեղ իրականացված աշխատանքը նպատակ ուներ բակն ու այգին նրանց համար դարձնելու առավել գրավիչ ու հաճելի, իսկ լողավազանների բարեկարգումը՝ առավել օգտակար։
Նշենք, որ Նոր Խարբերդի մասնագիտացված մանկատունը գործում է 1950թ․-ից։ Ներկայումս մանկատանը ապրում են 6-18 տարեկան 222 ֆիզիկական եւ մտավոր հատուկ կարիքներ ունեցող երեխաներ։
Մանկատունը իրականացնում է երեխաների երեխաների շուրջօրյա խնամքը, մատուցում է կրթադաստիարակչական, սոցիալ-առողջապահական եւ վերականգնողական ծառայություններ, կազմակերպում է սննդի, երեխաների ամառային, ձմեռային հանգիստը, ինչպես նաեւ ապահովում է 18 տարին լրացած սաների մասնագիտացված այլ հաստատություններ տեղափոխումը։
Մանկատանը երեխաների համար իրականացվում ենհատուկ վերականգնողական ծառայություններ, ինչպիսիք են ֆիզիոթերապիան, էրգոթերապիան,լոգոպեդական ծառայությունը, հիպոթերապիան։
Երեխաների ուսուցումն ու դաստիարակությունը իրականացվում են հատուկ մշակված ծրագրերով, որոնց արդյունավետ իրականացման նպատակով կազմակերպված է նաեւ մասնագիտական ուսուցում (փայտամշակում, կավագործություն, ձեռագործություն, մաքրամե)։