Հայաստանի Արարատի մարզի Մասիս քաղաքի Երիտասարդական կենտրոնում այսօր՝ ապրիլի 21-ին, ՄԱԿ-ի անկյուն է բացվել՝ ՄԱԿ-ի հանրային տեղեկատվության վարչության երեւանյան գրասենյակի եւ Մասիսի զարգացման հիմնադրամի նախաձեռնությամբ։
ՄԱԿ-ի հայաստանյան գրասենյակից NEWS.am-ին հայտնում են, որ ՄԱԿ-ի այս անկյունը, որը Հայաստանում 17-րդն է իր տեսակի մեջ, նպատակ ունի Երիտասարդական կենտրոնի այցելուներին եւ պարզապես հետաքրքրված անձանց հնարավորություն տալ օգտվելու ՄԱԿ-ի հրատարակություններից եւ այլ նյութերից։ Այդ միջոցով նրանք կարող են ծանոթանալ ՄԱԿ-ի արժեքներին եւ նպատակներին, կազմակերպության մանդատին, քաղաքականություններին ու ամենաբազմազան ոլորտներում գործունեությանը։ Որպես արդյունք՝ այս ամենը կնպաստի երիտասարդության զորացմանն ու նրանց ներգրավվածությանը ՄԱԿ-ի գլոբալ օրակարգի իրականացման գործում։
ՄԱԿ-ի հանրային տեղեկատվության վարչության երեւանյան գրասենյակի ղեկավար Արմինե Հալաջյանը շեշտեց Մասիսում ՄԱԿ-ի անկյան բացման կարեւորությունը. «Երեւանից դուրս նոր գործընկերների հետ մեր համագործակցության շրջանակներում եւ որպես գլխավոր նպատակ ունենալով մեր հիմնական թիրախային խմբին՝ երիտասարդությանը հասնելը՝ ՄԱԿ-ի երեւանյան տեղեկատվական գրասենյակը բացում է ՄԱԿ-ի այս անկյունը Մասիսում։ Այս անկյունը կարող է լավ մեկնարկ լինել այս կենտրոնի այցելուներին ՄԱԿ-ին մոտեցնելու՝ առանց ֆիզիկապես ՄԱԿ-ի գրասենյակում գտնվելու անհրաժեշտության։ Ակնկալում ենք հետագա համագործակցություն եւ փոխայցելություններ ամենամոտ ապագայում»։
ՄԱԿ-ի անկյան բացման պաշտոնական արարողությանը հետեւեցին ՄԱԿ-ի մասին պատմող «Կհանդիպենք» անիմացիոն ֆիլմի դիտումը եւ ՄԱԿ-ի Զարգացման ծրագրի ու ՄԱԿ-ի բնակչության հիմնադրամի ներկայացուցիչների մասնակցությամբ ինտերակտիվ քննարկումը։ Միջոցառումը եզրափակվեց Մասիսի երիտասարդների կազմակերպած մշակութային ծրագրով։
