Բելառուսում գյուղտեխնիկա արտադրողներն ու մատակարարները, որոնք հետաքրքրված են հայկական շուկայով, ապա կարող են եւս մասնակից դառնալ համապատասխան ծրագրին : Այս մասին, այսօր՝ ապրիլի 21-ին, ՀՀ-ում Բելառուսի դեսպան Իգոր Նազարուկի հետ հանդիպման ժամանակ նշել է ՀՀ գյուղատնտեսության նախարար Իգնատի Առաքելյանը:
Գյուղնախարարությունից NEWS.am-ին հայտնում են, որ նրանք քննարկել են գյուղատնտեսության ոլորտում համագործակցության շրջանակների ընդլայնման հնարավորությունը:
Իգնատի Առաքելյանը տեղեկացրել է, որ մեկնարկել է «Հայաստանի Հանրապետությունում գյուղատնտեսական տեխնիկայի ֆինանսական վարձակալության` լիզինգի պետական աջակցության» ծրագիրը, որի նպատակն է վերազինել եւ արդիականացնել գյուղատնտեսական տեխնիկայի պարկը:
«Այս ծրագրով մենք ստեղծել ենք մեխանիզմ, որով ֆերմերն ինքը կարող է որոշել, թե ինչ գյուղտեխնիկա է նրան հարկավոր գյուղատնտեական աշխատանքներն արդյունավետ կազմակերպելու համար: Շուկան ազատ է, սահմանափակումներ չկան, եւ եթե Բելառուսում գտնվեն գյուղտեխնիկա արտադրողներ եւ մատակարարներ, որոնք հետաքրքրված են հայկական շուկայով, ապա կարող են եւս մասնակից դառնալ ծրագրին», - նշել է նախարար Իգնատի Առաքելյանը:
Դեսպան Իգոր Նազարուկն իր հերթին նախարարին է ներկայացրել Բելառուսում գյուղատնտեսական տեխնիկայի տրամադրման պայմանները, պետության կողմից արտադրողներին եւ մատակարարնեին տրամադրվող աջակցության գործիքները: Քննարկվել են այս ուղղությամբ հայկական եւ բելառուսական պետական, մասնավոր եւ ֆինանսական կառույցների ներգրավմամբ փոխգործակցության հնարավոր ուղիները:
Հանդիպման ընթացքում կողմերը քննարկել են նաեւ անտառային տնտեսությունների արդյունավետ կառավարմանն առնչվող հարցեր: Մասնավորապես դիտարկել երկու երկրների միջեւ առկա փոխգործակցության սերտացման հնարավորությունը: Առաջարկվել է նաեւ ուսումնասիրել հետագայում անտառանյութի վերամշակման գործարանի հիմնման հնարավորությունը:
Բելառուսի դեսպանը նշել է, որ իրենք հետաքրքրված են բելառուսական պարարտանյութը Հայաստանում իրացնելու հնարավորությամբ:
Զրույցի ընթացքում անդրադարձ է կատարվել Բելառուսի ագրարային բուհերում հայ մասնագետների ուսուցման եւ վերապատրաստման հարցին:
Տեղեկացնելով, որ հունիսի 6-ից 10-ը Մինսկում կազմակերպվելու է ամենամյա «Բելագրո» մասնագիտացված միջազգային ցուցահանդեսը` Բելառուսի դեսպան Իգոր Նազարուկը առաջարկել է հայկական կողմին եւս մասնակցել այդ միջոցառմանը: