Ստացվել են Շվեդիայի Օրեբրո քաղաքի ոստիկանական բաժանմունքում մահացած Հայաստանի քաղաքացի 32-ամյա Դավիթ Բարսեղյանի գործով դատաբժշկական փորձաքննության պատասխանները: Այսօր՝ ապրիլի 21-ին, NEWS.am-ի հետ զրույցում Դավիթի իրավահաջորդի ներկայացուցիչ Մարկ Սաֆարյանը նշեց, որ փորձաքննության պատասխաններով եւս մեկ անգամ ապացուցվում է այն փաստը, որ Դավիթի իրավունքները կոպտորեն խախտվել են:
«Ոստիկանությունը դատաբժիշկներին է տրամադրել ինֆորմացիա, ըստ որի՝ Դավիթը ձերբակալման պահին շատ վատ է իրեն զգացել, արյուն է հետ տվել, ուշաթափվել է, միզել է: Ոստիկանությունն ասյպես է արդարանում՝ մտածել են, թե վախից է սկսել իրեն հոգեպես վատ զգալ, այդ պատճառով էլ օգնություն չեն ցուցաբերել, որը ցինիզմի է նման»,-ասաց նա:
Մարկ Սաֆարյանը նշեց, որ Դավիթին ոստիկանության բաժանմունք են տեղափոխել նրա թեւերը մտած՝ քաշելով:
«Թեւերը մտած, քաշելով Դավիթին տարել են ոստիկանության բաժին, մտցրել խուց: Հարցին՝ ինչու են քաշելով տարել Դավիթին, բացատրում են նրանով, թե դիմադրություն է ցույց տվել՝ այսինքն՝ մտածված չի ուզել քայլել, իրենք էլ մտել են թեւերը, որ տանեն: Բացի այդ, խցում հսկողություն է սահմանվում՝ 5 րոպեն մեկ, բայց պրակտիկայում այդ հսկողությունը 15 րոպեից ցածր չի լինում: Խցում Դավիթը ուժասպառ վիճակում է եղել, նրան կողքի վրա են պառկեցրել, որ չխեղդվի, հետո դուրս են եկել այդտեղից, մի ժամից հետո նրան մահացած են հայտնաբերել խցում»,-ասաց պաշտպանը:
Նրա խոսքով, Դավիթի մահվան պատճառների մեջ նշված է՝ արտաքին միջամտություն չի եղել, խմիչքի, թմրանյութի հետքեր չկան արյան մեջ, նա մահացել է խեղդվելու հետեւանքով եւ արյան զեղումից. «Հետ տալիս ստամոքսահյութը լցվել է թոքերը ու խեղդվել է»:
Պաշտպանը նշեց, որ Շվեդիա Արդարադատության կանցլերին է փոխանցվել դատաբժշկական փորձաքննության պատասխանները:
Ավելի վաղ NEWS.am-ի հետ զրույցում Դավիթի ընկեր Խորեն Սինանյանը նշել էր, որ Դավիթը մահացել է շվեդական ոստիկանության արհամարհական վերաբերմունքի պատճառով: Ըստ Սինանյանի՝ ՀՀ քաղաքացի Դավիթ Բարսեղյանը որպես զբոսաշրջիկ մեկնել էր Շվեդիայի Օրեբրո քաղաք: Երբ Դավիթի ինքնազգացողությունը վատացել է, ընկերները նստեցրել են մեքենան, որպեսզի տանեն հիվանդանոց, սակայն ոստիկանները կտրել են ճանապարհը եւ թույլ չեն տվել Դավիթին հասցնել հիվանդանոց:
