Երեւանի քաղաքապետ, քաղաքապետի թեկնածու Տարոն Մարգարյանը Երեւանի տրանսպորտի ոլորտում բարեփոխումներ է խոստանում: Այս մասին այսօր՝ ապրիլի 21-ին, Երեւանի ավագանու ընտրությունների քարոզարշավի մեկնարկին, լրագրողների հետ զրույցում ասել է նա:
«Տրանսպորտի խնդիրը վերջին 5 տարիներին չի առաջացել, անկախությունից ի վեր մենք ունեցել ենք քաղաքային տրանսպորտի խնդիրը: Բայց դրա լուծման ձեւերն ավելի լավ պատկերացնում է գործող թիմը եւ այն թիմը, որն իր մաշկի վրա է դա զգացել: Այս տարիների ընթացքում միջազգային փորձն ուսումնասիրելով, զարգացած քույր քաղաքների փորձն ուսումնասիրելով արդեն քայլեր ենք ձեռնարկում այդ ուղղությամբ: Տրանսպորտի ոլորտում մեծ բարեփոխումներ են իրականացվելու, ուղղակի խոսքեր պետք է չլինեն, քաղաքացիներին պետք է խնդրենք, որպեսզի մի քիչ համբերատար լինեն եւ մենք կարճ ժամանակում կփորձենք լուծել այդ խնդիրը»,-ասաց նա:
Նշենք, որ Երեւանի ավագանու ընտրությունները կայանալու են մայիսի 14-ին, որին մասնակցում են երեք ուժեր՝ ՀՀԿ-ն, որի քաղաքապետի թեկնածուն Տարոն Մարգարյանն է, «Ելք» դաշինքը, որի քաղաքապետի թեկնածուն Նիկոլ Փաշինյանն է, եւ «Երկիր Ծիրանի» կուսակցությունը, որի թեկնածուն Զարուհի Փոստանջյանն է: