Այսօր խաղաղության հասնելու համար անհրաժեշտ է սեփական պատմության սեւ էջերի ճանաչումը, որովհետեւ նրանք, ովքեր մոռանում են պատմությունը, դատապարտված են այն կրկնելուն: Այս մասին հայտարարել է ԱՄՆ կոնգրեսական Ջիմ Քոսթան:
Նա հիշեցրել է, որ իր մանկությունն անցկացրել է Ֆրեզնոյում Աբրահամյանների, Քարայանների եւ Քալիջյանների հետ եւ դեռ մանուկ հասակից տեղեկացվել է Հայոց ցեղասպանության սարսափների մասին: «Ես երբեք չեմ մոռացել 20-րդ դարի առաջին Ցեղասպանության մասին այդ պատմությունները: Բոլորս գիտակցում ենք, որ այսօր խաղաղության հասնելու համար անհրաժեշտ է սեփական պատմության սեւ էջերի ճանաչումը, որովհետեւ նրանք, ովքեր մոռանում են պատմությունը, դատապարտված են այն կրկնելուն: Հենց այդ պատճառով է Հայոց ցեղասպանության՝ 20-րդ դարի առաջին ցեղասպանության ճանաչումն այսքան կարեւոր»:
Կոնգրեսականը հիշատակել է, որ Ֆրեզնոյի համալսարանում կանգնած է Հայոց ցեղասպանության հուշարձան, ամերիկյան համալսարաններում Հայոց ցեղասպանությանը նվիրված միակ հուշարձանը, որը բաղկացած է շրջանաձեւ տեղադրված սյուներից. «Սյուները խորհրդանշում են պատմական Հայաստանի հատվածները, անավարտ պողպատը օղակը՝ հայոց պատմության ճեղքումը՝ կոտրվածք, որն առաջ է եկել Հայոց ցեղասպանության արդյունքում»:
