Եթե ոստիկանությունը գիտակցում է, որ պետք է փոխվի, Մարդու իրավունքների պաշտպանի՝ հուլիսյան իրադարձությունների վերաբերյալ արտահերթ հրապարակային զեկույցը նրանց համար կարող է լավ ուղեցույց լինել: NEWS.am-ի հետ զրույցում նման կարծիք հայտնեց Ազգային ժողովի պատգամավոր Թեւան Պողոսյանը:
«Ինչ–որ չափով հաճելիորեն զարմացած եմ, որովհետեւ ինքս այն հազվագյուտ պատգամավորներից էի, որ խորհրդարանում դեմ եմ քվեարկել Թաթոյանի թեկնածությանը, սակայն հաճելիորեն զարմացած եմ այս զեկույցի խիստ եւ պրոֆեսիոնալ ձեւով տրված գնահատականներից: Ասեմ, որ շատ ուրախ կլինեմ, եթե իսկապես այս զեկույցը ոչ թե դառնա հերթական, այլ հետեւողականորեն բոլոր այս գործերով քննություն կատարվի, բոլոր մեղավորները կրեն պատիժ: Կոչ կանեմ պատկան մարմիններին, առաջին հերթին՝ ոստիկանությանը, որ շատ ուշադիր, մանրամասն զննեն այս զեկույցը եւ դասեր քաղեն բոլոր բարձրացված խնդիրներից, համապատասխան հետեւություններ անեն եւ պատիժներ կիրառվեն մեղավորների նկատմամբ: Ոստիկանության համար այս զեկույցը կարող է շատ լավ ուղեցույց լինել այն բոլոր խնդիրների համար, թե որոնք են եղել բացթողումները, որտեղ է պետք շտկումներ անել»,- ասաց նա:
Անդրադառնալով սոցցանցերում մեկնաբանություններին, թե Արման Թաթոյանի զեկույցն ուշացած էր, Թեւան Պողոսյանը նշեց, որ իհարկե, կարող էր շատ ավելի շուտ լինել, սակայն ուրախ է, որ այս ժամանակահատվածն օգտագործվել է այսպիսի մակարդակի զեկույց պատրաստելու եւ ճիշտ գնահատականները հնչեցնելու համար:
Հիշեցնենք, որ ՄԻՊ զեկույցում խիստ գնահատականներ կան հուլիսյան իրադարձությունների ժամանակ ոստիկանության գործողությունների վերաբերյալ: Մասնավորապես, հուլիսի 29-ին Սարի թաղում ոստիկանների կողմից հատուկ միջոցների կիրառումը, ըստ զեկույցի, եղել է անհամաչափ, իսկ լրագրողների նկատմամբ կիրառված բռնության նպատակն է եղել նաեւ պատժել նրանց: