Երեւանի քաղաքապետ Տարոն Մարգարյանն իր հարստության աղբյուրներով հետաքրքրվողներին խորհուրդ է տալիս ուսումնասիրել իր հայտարարագրերը՝ 2000–ական թվականներից սկսած։ Արաբկիրում այսօր՝ ապրիլի 22–ին, լրագրողների հետ զրույցում նա անդրադարձել է «Երկիր Ծիրանի» կուսակցության քաղաքապետի թեկնածու Զարուհի Փոստանջյանի այն մեղադրանքներին, որ Տարոն Մարգարյանի հարստության մեծ մասը Երեւանի բյուջեի յուրացումներից է ձեւավորվել։
«Անկեղծ չեմ լսել՝ ինչ է ասել, ես տեղյակ չեմ: Եթե խոսում է իմ կարողության մասին, ես դեռ 2000–ական թվականներից իմ հայտարարագրում նշել եմ իմ կարողությունների մասին, թող վերցնեն ուսումնասիրեն»,–ասաց Տարոն Մարգարյանը։
Ինչ վերաբերում է «Ելք» դաշինքի անդամ Էդմոն Մարուքյանի հիշեցմանը, որ «ավելի լավ Երեւան» խոստացող ՀՀԿ–ն փորձում էր կրկնակի բարձրացնել տրանսպորտի ուղեվարձը ու դարձնել 200 դրամ, Տարոն Մարգարյանն ասաց, թե չի հիշում 200 դրամի մասին։
Դիտարկմանը, որ ՀՀԿ-ի խոստացած ավելի լավ Երեւանում մինչ օրս չի լուծվել մայրաքաղաքի ամենակարեւոր խնդիրը՝ տրանսպորտի հարցը, Տարոն Մարգարյանն արձագանքեց. «Ես համաձայն չեմ: Ես վստահ եմ մեր երեւանցիների վրա, նրանք չորս տարի շարունակ տեսել են մեր թիմի աշխատանքը, մեր ընդդիմախոսները մի քանի խնդիր են բարձրաձայնում, ես կարող եմ բազմաթիվ խնդիրներից խոսել, իրենք պետք է մի հինգ տարի ծանոթանան քաղաքային տնտեսության հետ, նոր իմանան ինչ խնդիրներ կան քաղաքային տնտեսությունում»։
Տարոն Մարգարյանը մանրամասնեց, թե ինչու են քանդվել Երեւանի պատմական շենքերը՝ նշելով, որ քանդված շենքերը պատմամշակութային արժեքներ չեն եղել։
Ինչ վերաբերում է Հայաստանի առաջին հանրապետության վարչապետ Արամ Մանուկյանի փլուզվող տանը, նա ասաց, որ դա տունը մասնավորեցրած անձի խնդիրն է, ոչ թե քաղաքապետարանի։