Գյումրիի ռուսական 102-րդ ռազմաբազայի զինծառայողին, նախնական տվյալներով, սպանել են կենցաղային հողի վրա: Այս մասին NEWS.am-ին հայտնեցին Հարավային ռազմական օկրուգի (ՀՌՕ) մամուլի ծառայությունում:
Հաղորդագրության համաձայն՝ ապրիլի 22-ին տեղական ժամանակով 17:00-ի սահմաններում զորամասից ոչ հեռու դանակով զինված քաղաքացիական անձը հարձակվել է ռուսական ռազմաբազայի պայմանագրային զինծառայողի վրա: «Դանակի հարվածի հետեւանքով զինծառայողը տեղում մահացել է: Գյումրիի ոստիկանությունը ձերբակալել է հարձակումն իրագործած անձին: Փաստի առիթով ռազմաբազայի շտաբի հրամանատարությունը տեղի իրավապահների հետ հետաքննություն է անցկացնում»,- ասված է ՀՌՕ-ի մամուլի ծառայության հաղորդագրությունում:
Ավելի վաղ NEWS.am-ը հայտնել էր, որ փաստի առիթով հարուցվել է քրեական գործ՝ 104-րդ հոդվածի 1-ին մասի հատկանիշներով։ Կատարվում է նախաքննություն՝ դեպքի մանրամասները պարզելու համար։ Սպանված զինծառայողի անձը հաստատվել է. նա Դմիտրի Յալպաեւն է, 21 տարեկան, պայմանագրային զինծառայող էր: Սպանությունը կատարելու կասկածանքով ձերբակալվել է մեկ անձ՝ 20-ամյա Ջ.Ա.-ն:
