Փարիզում հարյուրավոր ոստիկանների կանայք եւ ընկերուհիները Ելիսեյան դաշտերում ցույցի են դուրս եկել՝ բողոքելով Ֆրանսիայում բռնության աճի դեմ: Այս մասին հաղորդում է BBC-ն:
Ցույցերի առիթը Փարիզում բազմիցս դատապարտված Քարիզ Շերֆիի կողմից ոստիկան Քսավիե Ժուգելեի սպանությունն է: Հարձակման հետեւանքով եւս երկու ոստիկան վիրավորվել է, ինչից հետո հարձակվողին գնդակահարել են:
Ոստիկանների կանայք երթով անցել են քաղաքի կենտրոնական փողոցներով: Նրանք սեւ եւ վարդագույն փուչիկներով են եղել:
Միաժամանակ, ֆրանսիական լրատվամիջոցների հաղորդմամբ, Փարիզի Հյուսիսային կայարանում տղամարդու են ձերբակալել, որը դանակով զինված մոտեցել է ոստիկաններին:
Այս իրադարձությունները տեղի են ունենում կիրակի նախանշված նախագահական ընտրությունների առաջին փուլի նախաշեմին:
Նախագահի թեկնածուներին մեղադրում են նախընտրական արշավի ընթացքում ելույթներում ոստիկանների սպանության թեման սեփական քաղաքական շահերին ծառայեցնելու համար: