Շվեդիայի Օրեբրո քաղաքի ոստիկանական բաժանմունքում մահացած Հայաստանի քաղաքացի 32-ամյա Դավիթ Բարսեղյանի գործով արդյոք քրեական գործ կհարուցվի, թե ոչ, դեռ պարզ չէ: NEWS.am-ի հետ զրույցում Դավիթի իրավահաջորդի ներկայացուցիչ Մարկ Սաֆարյանը նշեց, որ նախաքննությունը դեռ շարունակվում է եւ միայն նախաքննության ավարտից հետո պարզ կլինի՝ քրեական գործ կհարուցվի, թե ոչ:
«Մենք հիմա սպասում ենք դեպքի տեսագրություններին: Կավարտվի գործի նախաքննությունը եւ պարզ կլինի` քրեական գործ հարուցվում է, թե ոչ»,-ասաց նա:
Մարկ Սաֆարյանը նշել էր, որ Դավիթի մահվան պատճառների մեջ նշված է, որ նա մահացել է խեղդվելու հետեւանքով (ստամոքսահյութը լցվել է նրա թոքերի մեջ) եւ արյան զեղումի:
Շվեդիայի արդարադատության կանցլերին են արդեն փոխանցվել դատաբժշկական փորձաքննության պատասխանները:
Ավելի վաղ NEWS.am-ի հետ զրույցում Դավիթի ընկեր Խորեն Սինանյանը նշել էր, որ Դավիթը մահացել է շվեդական ոստիկանության արհամարհական վերաբերմունքի պատճառով: Ըստ Սինանյանի՝ ՀՀ քաղաքացի Դավիթ Բարսեղյանը որպես զբոսաշրջիկ մեկնել էր Շվեդիայի Օրեբրո քաղաք: Երբ Դավիթի ինքնազգացողությունը վատացել է, ընկերները նստեցրել են մեքենան, որպեսզի տանեն հիվանդանոց, սակայն ոստիկանները կտրել են ճանապարհը եւ թույլ չեն տվել Դավիթին հասցնել հիվանդանոց, այդ վիճակում ոստիկանները նրան տեղափոխել են ոստիկանություն:
