Քենիայի բնության հանրահայտ պաշտպան Կուկի Գոլմանը հրազենային վիրավորում է ստացել որովայնի մասում, Reuters գործակալությանն այս մասին հայտնել է անանուն աղբյուրը Գոլմանի շրջապատից։
Կուկի Գոլմանի ավտոմեքենան դարանակալման մեջ էր հայտնվել Քենիայի կենտրոնական շրջանում։ Առաջին օգնությունը ցուցաբերվել է Նայրոբիի հիվանդանոցում, որտեղ 73-ամյա բնապաշտպանին ռազմական ուղղաթիռով են տեղափոխել։
Վերջին ամիսներին Լայկոպիա արգելոցի տարածքում այսպես կոչված «արոտավայրերի պատերազմ» է ընթանում, որի պատճառը երաշտն է։ Անասնապահների կիսաքոչվոր ցեղերը, զինված նետերով ու ինքնաձիգներով, փորձում են ներթափանցել արգելոցի տարածք։ Արգելոցը, որը զբոսաշրջիկներ է գրավում ամբողջ աշխարհից, այդ տարածաշրջանի եկամուտի հիմնական աղբյուրն է ու պահպանվում է կառավարական զորքերի կողմից։
«Արոտավայրերի պատերազմը» արդեն 30 մահվան պատճառ է դարձել։ Կուկի Գոլմանի հիմնած արգելոցի վրա մեկ ամիս առաջ հարձակում էր իրականացվել, որն ուղեկցվել էր հրկիզումով։
Կուկի Գոլմանը «Ես երազել եմ Աֆրիկայի մասին» հանրահայտ գրքի հեղինակն է, որը էկրանավորվել է ամերիկացի ռեժիսոր Հյու Հադսոնի կողմից։ Ֆիլմում Կուկիի դերը կատարել է Քիմ Բեյսինգերը։
