Ազգային Ժողովի պատգամավոր Սամվել Ալեքսանյանն այսօր՝ ապրիլի 23-ին, Երեւանի Մալաթիա-Սեբաստիա վարչական շրջանում ներկա էր Երեւանի քաղաքապետ, քաղաքապետի թեկնածու Տարոն Մարգարյանի՝ բնակիչների հետ հանդիպմանը: NEWS.am-ի հետ զրույցում Սամվել Ալեքսանյանը նշեց, որ աջակցում է Տարոն Մարգարյանին, քանի որ կարծում է, որ այս տարիների ընթացքում նա բավականին շատ աշխատանք է կատարել Երեւանի եւ Մալաթիա-Սեբաստիա վարչական շրջանի համար: Նա նշեց, որ Մալաթիայի բնակիչները գոն են նրա աշխատանքից եւ վստահ է, որ նրանք ընտրելու են նրան:
«Տարոն Մարգարյանի աշխատանքը շատ լավ եմ գնահատում: Մալաթիա-Սեբաստիա վարչական շրջանի բնակչությունը գոհ է նրա աշխատանքից, վստահ եմ, որ կրկին կընտրի Տարոն Մարգարյանին»,-ասաց նա:
Հարցին՝ արդյոք Տարոն Մարգարյանին աջակցում է նրա համար, որովհետեւ իր եղբորորդուն նշանակել է Մալաթիա-Սեբաստիա վարչական շրջանի ղեկավար, Սամվել Ալեքսանյանը պատասխանեց. «Հիմա որ իմ եղբորորդին չլիներ, ես Տարոն Մարգարյանին չէի աջակցելո՞ւ»:
Հիշեցնենք, որ մայիսի 14-ին տեղի է ունենալու Երեւանի քաղաքապետի ընտրությունները: